ધાનેરા તાલુકાના મેવાડા ગામ ખાતે આવેલી અનુપમ પ્રાથમિક શાળામાં તાલુકા કક્ષાના બાળ વૈજ્ઞાનિક પ્રદર્શનનું ઉત્સાહપૂર્ણ વાતાવરણમાં ભવ્ય આયોજન કરવામાં આવ્યું હતું. આ વિજ્ઞાન મેળાનો મુખ્ય વિષય ‘ટકાઉ અને વિકસિત ભારત માટે વિજ્ઞાન, ટેકનોલોજી અને નવીનતા’ રાખવામાં આવ્યો હતો. ગ્રામીણ વિસ્તારના વિદ્યાર્થીઓમાં નાનપણથી જ વૈજ્ઞાનિક દ્રષ્ટિકોણ કેળવાય, તેમની જિજ્ઞાસાવૃત્તિને યોગ્ય મંચ મળે અને તેઓ સંશોધન તરફ પ્રેરાય તેવા ઉમદા આશય સાથે શિક્ષણ વિભાગના માર્ગદર્શન હેઠળ આ સમગ્ર આયોજન સંપન્ન થયું હતું.
આ પ્રદર્શનમાં ધાનેરા તાલુકાની અનેક પ્રાથમિક શાળાઓમાંથી આવેલા પ્રતિભાશાળી બાળ વૈજ્ઞાનિકોએ ઉત્સાહભેર ભાગ લીધો હતો. વિદ્યાર્થીઓએ પોતાના માર્ગદર્શક શિક્ષકોની મદદથી પર્યાવરણ સુરક્ષા, સૌર ઊર્જા અને નવીનીકરણીય સ્ત્રોતો, આધુનિક કૃષિ પદ્ધતિઓ, સ્વચ્છતા અને જળ સંચય જેવા પ્રસ્તુત વિષયો પર આધારિત મોડેલ્સ તૈયાર કર્યા હતા. સમગ્ર પ્રદર્શન દરમિયાન વિજ્ઞાનના વિવિધ સિદ્ધાંતો સમજાવતી કુલ ૬૫ જેટલી કૃતિઓ રજૂ કરવામાં આવી હતી. બાળકોએ પોતાના પ્રોજેક્ટ્સ વિશે ખૂબ જ આત્મવિશ્વાસપૂર્વક સમજૂતી આપીને સૌનું ધ્યાન આકર્ષિત કર્યું હતું.
કાર્યક્રમના ઉદ્ઘાટન અને નિરીક્ષણ દરમિયાન પૂર્વ ધારાસભ્ય મફતલાલ પુરોહિત, કાંતિભાઈ ડાભી, તાલુકા પ્રાથમિક શિક્ષણ અધિકારી જગમાલભાઈ પટેલ, બ્લોક રિસોર્સ સેન્ટરના સંયોજક વીરાભાઈ ચૌધરી, ગૌરવભાઈ સોલંકી, પ્રાગજીભાઈ, ક્લસ્ટર રિસોર્સ સેન્ટરના સંયોજક નટવરભાઈ, રમેશભાઈ વાછોલા તેમજ ઈશ્વરભાઈ પટેલ સહિતના અનેક અગ્રણીઓ અને મહાનુભાવો વિશેષ ઉપસ્થિત રહ્યા હતા. તમામ મહાનુભાવોએ પ્રત્યેક સ્ટોલની મુલાકાત લઈને કૃતિઓનું બારીકાઈથી નિરીક્ષણ કર્યું હતું. તેમણે બાળ વૈજ્ઞાનિકોની કલ્પનાશક્તિ, સર્જનાત્મકતા અને ઉત્સાહની મુક્ત મને પ્રશંસા કરી તેમને ભવિષ્યમાં રાષ્ટ્ર નિર્માણમાં યોગદાન આપવા પ્રોત્સાહિત કર્યા હતા.
