ચોમાસાની સત્તાવાર વિદાયની પ્રક્રિયા વચ્ચે સમગ્ર રાજ્યમાં વાતાવરણમાં પલટો જોવા મળી રહ્યો છે. પવનની દિશા બદલાઈને ઉત્તર-પશ્ચિમ તરફથી ફૂંકાવાની શરૂઆત થતાં ગુજરાતમાં શિયાળાનું ધીમા પગલે આગમન થઈ રહ્યું છે. વહેલી સવારે અને મોડી રાત્રે ગુલાબી ઠંડીનો અહેસાસ થઈ રહ્યો છે, જ્યારે બપોરના સમયે આકરો તડકો રહેતા નાગરિકો હાલ બેવડી ઋતુનો સામનો કરી રહ્યા છે. રાજ્યના મોટાભાગના શહેરોમાં લઘુત્તમ તાપમાનમાં બે ડિગ્રી જેટલો ઘટાડો નોંધાયો છે, જેના પરિણામે રાત્રિના વાતાવરણમાં ખુશનુમા ઠંડક પ્રસરી રહી છે.
રાજ્યના વિવિધ વિસ્તારોમાં નોંધાયેલા તાપમાનના આંકડા મુજબ, અમરેલીમાં લઘુત્તમ તાપમાન ૨૨.૨ ડિગ્રી નોંધાયું હતું, જે સામાન્ય કરતાં એક ડિગ્રી ઓછું છે. આ ઉપરાંત ગાંધીનગરમાં ૨૩, પોરબંદરમાં ૨૩.૪, ડીસામાં ૨૩.૫, કેશોદમાં ૨૩.૭ તેમજ ભુજમાં ૨૪ ડિગ્રી લઘુત્તમ તાપમાન રહ્યું હતું. રાજકોટ, વડોદરા, નલિયા, વલ્લભ વિદ્યાનગર, ભાવનગર, ઓખા, દ્વારકા અને જામનગર સહિત સમગ્ર સૌરાષ્ટ્ર અને ગુજરાતમાં પારો ૨૪ થી ૨૫ ડિગ્રીની આસપાસ રહ્યો છે. બીજી તરફ, મહત્તમ તાપમાનની વાત કરીએ તો સુરેન્દ્રનગરમાં સૌથી વધુ ૩૬.૬ ડિગ્રી, જ્યારે અમદાવાદ અને વડોદરામાં ૩૬.૪ ડિગ્રી તાપમાન નોંધાતા બપોરે આકરી ગરમી અને બફારાની સ્થિતિ યથાવત્ રહી છે.
હવામાન વિભાગના જણાવ્યા અનુસાર આગામી એક સપ્તાહ દરમિયાન મહત્તમ અને લઘુત્તમ તાપમાનમાં કોઈ મોટો ફેરફાર થવાની શક્યતા નથી. રાજ્યના મોટાભાગના વિસ્તારોમાં આકાશ સ્વચ્છ રહેશે અને હવામાન મુખ્યત્વે શુષ્ક રહેશે. જોકે, દક્ષિણ ગુજરાતના ડાંગ, નવસારી, વલસાડ તેમજ સંઘપ્રદેશ દમણ અને દાદરા નગર હવેલીમાં છૂટાછવાયા સ્થળોએ હળવાથી મધ્યમ વરસાદી ઝાપટાં પડી શકે છે. હાલમાં ચોમાસાની વિદાય રેખા ઉત્તરીય ક્ષેત્રોમાંથી પસાર થઈ રહી છે. ઓક્ટોબરના બીજા સપ્તાહથી રાત લાંબી થવાની સાથે પવનની દિશા વધુ સ્થિર થશે, જેના પગલે સવારના સમયે ઠંડીનું પ્રમાણ ક્રમશઃ વધશે અને શિયાળો સંપૂર્ણપણે જમાવટ કરશે.
