વલસાડ જિલ્લાના ભાગડાવડા ગામે સ્વચ્છતા અભિયાનને વેગ આપવા અને ગામને સુંદર બનાવવા માટે ગ્રામ પંચાયત દ્વારા એક પ્રશંસનીય તેમજ સરાહનીય પહેલ કરવામાં આવી છે. ગામમાં છેલ્લા કેટલાક સમયથી મુખ્ય રસ્તાઓ, જાહેર સ્થળો તેમજ ધાર્મિક સ્થળોની આસપાસ લોકો દ્વારા વધેલો ખોરાક અને એંઠવાડ બેફામપણે ફેંકી દેવામાં આવતો હતો. આ ગંદકીના કારણે પશુઓનું ધમાણ વધ્યું હતું અને સ્થાનિક રહીશો તેમજ વાહનચાલકો માટે ગંભીર જોખમ ઊભું થયું હતું. અવારનવાર થતી ગંદકીના લીધે સમગ્ર વિસ્તારમાં દુર્ગંધ ફેલાવાની સાથે રોગચાળો ફાટી નીકળવાની દહેશત પણ સતત સતાવતી હતી.
ગ્રામ પંચાયત દ્વારા અગાઉ પણ ગ્રામજનોને અનેક વખત સમજાવવાના પ્રયાસો કરવામાં આવ્યા હતા અને જાહેરમાં કચરો ન નાખવા માટે વિશેષ ટકોર કરવામાં આવી હતી. તેમ છતાં સમસ્યામાં કોઈ સુધારો ન થતાં આખરે ગ્રામ પંચાયતે લોકહિતમાં કડક રૂખ અપનાવવાની ફરજ પડી છે. આ ગંભીર સમસ્યાના કાયમી ઉકેલ માટે પંચાયત દ્વારા ગામના મુખ્ય વિસ્તારોમાં વિશેષ ચેતવણી બોર્ડ લગાવવામાં આવ્યા છે અને સોશિયલ તેમજ સાર્વજનિક માધ્યમો દ્વારા પણ કડક ચેતવણી ઉચ્ચારવામાં આવી છે.
હવે જો કોઈ પણ વ્યક્તિ જાહેર સ્થળો, રસ્તાઓ કે મંદિરોની આસપાસ ખોરાકનો કચરો નાખતા પકડાશે, તો તેની સામે પંચાયત દ્વારા સીધી કાયદેસરની કાર્યવાહી અને દંડ વસૂલવામાં આવશે. ગ્રામ પંચાયતે તમામ નાગરિકોને અપીલ કરી છે કે તેઓ પોતાના ઘરનો કચરો યોગ્ય રીતે નિકાલ કરે અને ગામને સ્વચ્છ, સ્વસ્થ તેમજ હરિયાળું રાખવામાં સહકાર આપે. ઉપરાંત, જો કોઈ નિયમ ભંગ કરતું નજરે ચડે તો તેની ત્વરિત જાણ પંચાયતને કરવા માટે પણ નાગરિકોને અનુરોધ કરવામાં આવ્યો છે.
