રાજકોટ જિલ્લાના ધોરાજી પંથકમાં ડુંગળીની ખેતી કરતા અન્નદાતાઓની મુશ્કેલીઓમાં ભારે વધારો થયો છે. ચાલુ વર્ષે તાપમાનમાં સતત થઈ રહેલા વધારાને કારણે વાતાવરણ પ્રતિકૂળ બન્યું છે, જેની સીધી અસર ડુંગળીના પાક પર વર્તાઈ રહી છે. ખેડૂતોના જણાવ્યા અનુસાર, છોડમાં પૂરતી ગાંઠ ન બંધાવાને કારણે અને જીવલેણ રોગચાળો ફેલાવાને લીધે પાકને વ્યાપક નુકસાન થવાની પૂરી ભીતિ સેવાઈ રહી છે. આ કુદરતી અને રોગચાળાના મારને કારણે ખેડૂતોનો ઉચાટ વધી ગયો છે.
સ્થિતિ એવી ગંભીર બની છે કે ખેડૂતોએ વીઘા દીઠ આશરે 25 હજાર રૂપિયા જેટલો માતબર ખર્ચ અત્યાર સુધીમાં કરી નાખ્યો છે, પરંતુ પાકમાં ફેલાયેલા 'પીળિયા' નામના રોગને કારણે હવે રોકાણ કરેલા નાણાં પણ પાછા ન નીકળે તેવી દહેશત સતાવી રહી છે. કેટલાક કિસ્સાઓમાં તો ખેડૂતોને સમગ્ર ડુંગળીનો પાક નિષ્ફળ જવાની ચિંતા પણ છે. આકરી મહેનત અને મોંઘા ખાતર-બિયારણના ખર્ચ છતાં હાથમાં આવેલો પાક બગડતો જોઈને ખેડૂત વર્ગ ચિંતાતુર મુદ્રામાં છે.
આ બધી જ મુશ્કેલીઓ વચ્ચે ધોરાજી માર્કેટયાર્ડમાંથી એક ઉત્સાહજનક સમાચાર પણ સામે આવ્યા છે, જ્યાં તૈયાર ડુંગળી વેચવા આવતા ખેડૂતોને ગયા વર્ષની સરખામણીએ સારા ભાવ મળી રહ્યા છે. હાલ માર્કેટમાં ડુંગળીના પ્રતિમણ 600 થી 750 રૂપિયા સુધીના ભાવ બોલાઈ રહ્યા છે, જેના કારણે જે ખેડૂતોનો પાક સારો ઉતર્યો છે તેમને આર્થિક ફાયદો થઈ રહ્યો છે. વ્યાપારી વર્ગ પણ આગામી દિવસોમાં ડુંગળીના બજારભાવમાં વધુ તેજી આવવાની આશા સેવી રહ્યો છે.
