સુરતના રમત જગતમાં ચાલતી આંતરિક ખેંચતાણ અને ગેરરીતિઓ ફરી એકવાર સપાટી પર આવી છે. સુરત ડિસ્ટ્રિક્ટ ક્રિકેટ એસોસિએશનની વાર્ષિક સામાન્ય સભામાં મહિલા ખેલાડીઓની સુરક્ષા, ભ્રષ્ટાચાર અને નાણાકીય અનિયમિતતા જેવા ગંભીર મુદ્દાઓને લઈને ભારે હોબાળો મચી ગયો હતો. બસોથી વધુ સભ્યોની ઉપસ્થિતિમાં મળેલી આ મહત્વપૂર્ણ બેઠકમાં સનસનાટીપૂર્ણ ઘટસ્ફોટ કરતા આક્ષેપ કરવામાં આવ્યો હતો કે સંસ્થાના એક કોચ દ્વારા મહિલા ખેલાડીને ટીમમાં સ્થાન મેળવવા માટે રાત્રિના સમયે ચેટિંગ કરવાની અયોગ્ય માગણી કરવામાં આવી હતી. આ મામલે ફરિયાદ હોવા છતાં જવાબદાર કોચ સામે પગલાં લેવાને બદલે તેને છાવરવામાં આવી રહ્યો હોવાનો દાવો કરવામાં આવ્યો હતો.
સામાન્ય સભા દરમિયાન સંસ્થાના સભ્ય દ્વારા ખુલાસો કરવામાં આવ્યો હતો કે તેમની પાસે સમગ્ર ઘટનાના ફોન રેકોર્ડિંગ્સ સહિતના પુરાવા છે, જે ટૂંક સમયમાં પોલીસ સમક્ષ રજૂ કરવામાં આવશે. આ સાથે જ ટેન્ડરિંગ પ્રક્રિયા વગર થયેલા વહીવટ, નિયમોનું ઉલ્લંઘન કરીને અંગત ઈ-મેઈલ મારફતે કરાયેલા આર્થિક વ્યવહારો અને કરોડો રૂપિયાની નાણાકીય ગેરરીતિ અંગે પણ પ્રશ્નો ઉઠાવવામાં આવ્યા હતા. વધુમાં, હોદ્દેદારો પોતાની ખાનગી એકેડેમી ચલાવતા હોવાથી હિતોનો ટકરાવ થતો હોવાનો તેમજ બનાવટી જન્મ તારીખના આધારે બહારના ખેલાડીઓને પ્રવેશ આપી સ્થાનિક પ્રતિભાઓની અવગણના કરવામાં આવતી હોવાનો પણ ગંભીર આરોપ મૂકવામાં આવ્યો હતો.
બીજી તરફ, આ તમામ આક્ષેપો સામે પ્રતિક્રિયા આપતાં સુરત ડિસ્ટ્રિક્ટ ક્રિકેટ એસોસિએશનના સેક્રેટરી ડોક્ટર નૈમેષ દેસાઈએ જણાવ્યું હતું કે સંસ્થા આવી બાબતો સામે શૂન્ય સહિષ્ણુતાની નીતિ ધરાવે છે. આજદિન સુધી સંસ્થાને કોઈપણ મહિલા ખેલાડી કે તેમના વાલી તરફથી આવી કોઈ સત્તાવાર ફરિયાદ મળી નથી. તેમણે સ્પષ્ટતા કરી કે એસોસિએશનમાં મહિલા કોચ કાર્યરત છે અને બાળ સુરક્ષા નીતિ અંતર્ગત તમામ નિયમોનું પાલન થાય છે. જો કોઈ સભ્ય દ્વારા આ મામલે નક્કર પુરાવા રજૂ કરવામાં આવશે, તો કાયદેસરની કડક કાર્યવાહી હાથ ધરવામાં આવશે.
