દેશભરની નામાંકિત એન્જિનિયરિંગ કોલેજોમાં પ્રવેશ મેળવવા માટે ઉત્સુક વિદ્યાર્થીઓ માટે મહત્વના સમાચાર સામે આવ્યા છે. નેશનલ ટેસ્ટિંગ એજન્સી (NTA) દ્વારા જોઈન્ટ એન્ટ્રન્સ એક્ઝામિનેશન (JEE Main) ૨૦૨૭ના સેશન-૧ માટે ઓનલાઈન રજીસ્ટ્રેશન પ્રક્રિયા ટૂંક સમયમાં જ પૂર્ણ થવા જઈ રહી છે. સત્તાવાર શિડ્યુલ મુજબ રેગ્યુલર ફી સાથે અરજી કરવાની છેલ્લી તારીખ ૨૨ નવેમ્બર ૨૦૨૬ છે. પરીક્ષાનું આયોજન આગામી વર્ષે જાન્યુઆરી મહિનાની ૨૦, ૨૧, ૨૨, ૨૩, ૨૪ અને ૨૮ તારીખ દરમિયાન કરવામાં આવશે. જે વિદ્યાર્થીઓએ હજુ સુધી અરજી પ્રક્રિયા પૂર્ણ કરી નથી અથવા ફી ભરવાની બાકી છે, તેમણે સમયમર્યાદા ધ્યાનમાં રાખીને વહેલી તકે આ પ્રક્રિયા આટોપી લેવાની સલાહ આપવામાં આવી છે.
એનટીએ દ્વારા સોશિયલ મીડિયા પર શેર કરવામાં આવેલા તાજેતરના આંકડાઓ અનુસાર, અત્યાર સુધીમાં કુલ ૭,૮૬,૬૮৭ ઉમેદવારોએ સફળતાપૂર્વક પોતાના રજીસ્ટ્રેશન ફોર્મ સબમીટ કરી દીધા છે. આમાંથી ૫,૯૪,૨૫૯ ઉમેદવારોએ પરીક્ષા ફી ભરવાની પ્રક્રિયા પણ પૂર્ણ કરી લીધી છે. સત્તાવાર માહિતી મુજબ, ઉમેદવારોએ ચાર સરળ ચરણોમાં પોતાની અરજી પ્રક્રિયા પૂરી કરવાની રહેશે, જેમાં સૌપ્રથમ જરૂરી દસ્તાવેજો અપલોડ કરવા, ત્યારબાદ ફોર્મ સબમીટ કરવું, ફીની ચૂકવણી કરવી અને અંતે કન્ફર્મેશન પેજ ડાઉનલોડ કરવાનો સમાવેશ થાય છે. ખાસ નોંધવા જેવી બાબત એ છે કે ફીની સફળ ચુકવણી કર્યા બાદ જ ઓનલાઈન અરજી પત્રકનું કન્ફર્મેશન પેજ જનરેટ થાય છે.
અરજી કરતી વખતે વિદ્યાર્થીઓએ પાસપોર્ટ સાઈઝ ફોટો, સહી, ધોરણ ૧૦ ની માર્કશીટ તેમજ જો લાગુ પડતું હોય તો પીડબ્લ્યુડી (PwD) સર્ટિફિકેટ જેવા દસ્તાવેજો અપલોડ કરવાના રહેશે. આ ઉપરાંત, ઉમેદવારોએ અરજી ફોર્મ ભરતી વખતે તેમનો લાઈવ ફોટો પણ અપલોડ કરવાનો રહેશે. કોઈપણ પ્રકારની મૂંઝવણ કે ટેકનિકલ મુશ્કેલીના કિસ્સામાં વિદ્યાર્થીઓ એનટીએના સત્તાવાર ઈમેલ અથવા હેલ્પલાઈન નંબરો પર સંપર્ક કરી શકે છે. અંતિમ સમયની ભીડથી બચવા અને સર્વર ડાઉન થવાની સમસ્યા ટાળવા માટે ઉમેદવારોને વહેલી તકે સત્તાવાર વેબસાઇટ jeemain.nta.nic.in પર જઈને પોતાની અરજી પ્રક્રિયા સુરક્ષિત રીતે પૂર્ણ કરવા અનુરોધ કરવામાં આવ્યો છે.
