દેશભરના કોમોડિટી અને સ્થાનિક સરાફા બજારમાં છેલ્લા કેટલાક દિવસોથી કિંમતી ધાતુઓના ભાવમાં સતત ઉતાર-ચઢાવ વચ્ચે મોટો ઘટાડો જોવા મળી રહ્યો છે. મલ્ટી કોમોડિટી એક્સચેન્જ (MCX) પર ડિસેમ્બર એક્સપાયરીવાળી ચાંદીના વાયદા ભાવમાં અઠવાડિયા દરમિયાન મોટો કડાકો બોલાયો છે. શુક્રવારે ચાંદીનો ભાવ ઘટીને 1,76,543 રૂપિયા પ્રતિ કિલોગ્રામ પર પહોંચ્યો હતો, જે અગાઉ 1,84,787 રૂપિયા હતો. આમ, માત્ર એક જ સપ્તાહમાં ચાંદીના ભાવમાં 8,244 રૂપિયા પ્રતિ કિલોગ્રામનો મોટો ઘટાડો નોંધાયો છે, જેના કારણે રોકાણકારોમાં ચિંતા તો ખરીદદારોમાં રાહત જોવા મળી રહી છે.
ચાંદીના આ વર્તમાન ભાવની સરખામણી જો તેના ઐતિહાસિક ઉચ્ચ સ્તર સાથે કરવામાં આવે તો તફાવત ખૂબ મોટો નજરે પડે છે. આ વર્ષના જાન્યુઆરી મહિનામાં MCX પર ચાંદીનો ભાવ આકાશને આંબીને 4,20,048 રૂપિયા પ્રતિ કિલોગ્રામની સર્વોચ્ચ સપાટીએ પહોંચ્યો હતો. આ લાઇફટાઇમ હાઇ રેટની સરખામણીએ વર્તમાન બજારભાવ આશરે 2,43,505 રૂપિયા જેટલો ઓછો છે. ચાંદીની સાથેસાથે સોનાના વાયદા ભાવમાં પણ પીછેહઠ જોવા મળી છે અને 6 નવેમ્બરથી શુક્રવાર સુધીના કારોબારમાં 24 કેરેટ સોનું પ્રતિ 10 ગ્રામ આશરે 5,417 રૂપિયા સસ્તું થઈને 1,36,750 રૂપિયાના સ્તરે આવી ગયું છે.
વાયદા બજારની આ અસરો સીધી જ સ્થાનિક સરાફા બજારો પર પણ વર્તાઈ રહી છે. ઈન્ડિયન બુલિયન જ્વેલર્સ એસોસિયેશન (IBJA)ના આંકડા મુજબ, માત્ર ચાર દિવસના ટૂંકા સમયગાળામાં 24 કેરેટ સોનાના ભાવમાં 5,643 રૂપિયાનો ઘટાડો થઈને તે 1,35,809 રૂપિયા પ્રતિ 10 ગ્રામ પર પહોંચ્યું છે, જ્યારે એક કિલોગ્રામ ચાંદીનો ભાવ ઘટીને 1,78,000 રૂપિયા થયો છે. જોકે, ગ્રાહકોએ ધ્યાનમાં રાખવું રહ્યું કે આ જ્વેલરીના સરકારી કે એસોસિયેશનની વેબસાઇટ પરના દર છે, જ્યારે બજારમાં દાગીના ખરીદતી વખતે તેના પર 3 ટકા GST અને મેકિંગ ચાર્જ અલગથી ચૂકવવા પડે છે, જેથી અંતિમ કિંમતમાં તફાવત હોઈ શકે છે.
