જામનગર પોલીસ દ્વારા રાજ્યમાં ચાલતા “No Drugs In Jamnagar” અભિયાનને સાર્થક કરતી એક મોટી સફળતા સામે આવી છે. જામનગરના સુમેર ક્લબ રોડ પર એસ.ટી. ડેપોની નજીક આવેલી હોટલ સુમુખના રૂમ નંબર 108માં પરપ્રાંતીય શખ્સો દ્વારા શંકાસ્પદ પ્રવૃત્તિઓ ચલાવવામાં આવી રહી હોવાની સચોટ બાતમી સ્પેશિયલ ઓપરેશન ગ્રુપ (SOG)ની ટીમને મળી હતી. આ બાતમીના આધારે પોલીસ કાફલાએ તાત્કાલિક ધોરણે હોટલના આ રૂમ પર દરોડો પાડ્યો હતો, જ્યાંથી પંજાબના અમૃતસર જિલ્લાના બે શખ્સોને રંગે હાથે ઝડપી લેવામાં આવ્યા હતા.
પોલીસે પકડાયેલા આરોપીઓની સઘન તલાશી લેતા તેમની પાસેથી અંદાજે રૂ. 1,92,200 ની કિંમતનું 9.61 ગ્રામ શુદ્ધ હેરોઈન પદાર્થ મળી આવ્યો હતો. આ ઉપરાંત, ગુનામાં ઉપયોગમાં લેવાયેલા બે મોબાઈલ ફોન અને રોકડ રકમ સહિત કુલ રૂપિયા 2,15,920 નો મુદ્દામાલ પોલીસ દ્વારા જપ્ત કરવામાં આવ્યો છે. પકડાયેલા બંને આરોપીઓની ઓળખ પંજાબના અમૃતસર જિલ્લાના ભીંડર ગામના રતનગ્રહ વિસ્તારમાં રહેતા લવપ્રીતસિંઘ અને હરપ્રીતસિંઘ તરીકે થઈ છે, જેઓ આ માદક પદાર્થ સાથે જામનગર સુધી કેવી રીતે પહોંચ્યા તે તપાસનો વિષય બન્યો છે.
આ સમગ્ર ઓપરેશન રાજકોટ રેન્જના આઈજી નિર્લિપ્ત રાય અને જામનગર જિલ્લા પોલીસ વડા ડો. રવિ મોહન સૈનીના માર્ગદર્શન હેઠળ પાર પાડવામાં આવ્યું હતું. એસઓજીના પોલીસ ઇન્સ્પેક્ટર વી.જે. રાઠોડ અને ટીમની સક્રિયતાથી પંજાબના આ બંને શખ્સો વિરુદ્ધ જામનગર સિટી ‘એ’ ડિવિઝન પોલીસ સ્ટેશનમાં એનડીપીએસ (NDPS) એક્ટ હેઠળ કાયદેસરનો ગુનો નોંધી દેવામાં આવ્યો છે. હાલ પોલીસ આ હેરોઈનનો જથ્થો પંજાબથી કયા માર્ગે લાવવામાં આવ્યો હતો અને જામનગરમાં સ્થાનિક સ્તરે કોને સપ્લાય કરવાનો હતો, તે અંગે ઊંડાણપૂર્વક પૂછપરછ હાથ ધરીને ડ્રગ્સ નેટવર્કના અન્ય કડીઓ શોધી રહી છે.
