વર્લ્ડ ચેમ્પિયનશિપ ઓફ લિજેન્ડ્સ ૨૦૨૬ ની સ્પર્ધામાં પાકિસ્તાની ક્રિકેટ ટીમને આંતરરાષ્ટ્રીય સ્તરે ફરી એકવાર ભારે નાલેશી અને અપમાનનો સામનો કરવો પડ્યો છે. ટુર્નામેન્ટમાં ભાગ લેવા સંદર્ભે પાકિસ્તાન ક્રિકેટ બોર્ડ દ્વારા આગળ ધરવામાં આવેલી અવ્યવહારુ અને હાસ્યાસ્પદ શરતોને આયોજકોએ સદંતર ફગાવી દીધી છે. બંને પક્ષો વચ્ચે સહમતી ન સધાતાં પાકિસ્તાન ચેમ્પિયન્સ ટીમને ટુર્નામેન્ટમાંથી બહાર કરી દેવામાં આવી છે. ખાસ બાબત એ છે કે પાકિસ્તાનની ટીમે હજુ સુધી આ સ્પર્ધામાં એક પણ મેચ રમી નથી અને તે પહેલાં જ તેમને બહાર થઈ જવું પડ્યું છે.
સમગ્ર વિવાદની વિગત એવી છે કે પાકિસ્તાન ક્રિકેટ બોર્ડે પોતાની ટીમને ટુર્નામેન્ટમાં રમવા માટે અનાપત્તિ પ્રમાણપત્ર આપવા સામે આકરી શરતો મૂકી હતી. પાકિસ્તાની બોર્ડે એવી માંગ કરી હતી કે ગત વર્ષે મેચમાં ગેરહાજર રહેવા બદલ ભારતીય ખેલાડીઓ લેખિતમાં માફી માંગે. આ સાથે જ બંને ટીમો વચ્ચે ઔપચારિક હાથ મિલાવવાની લેખિત ખાતરી આપવાની પણ જીદ પકડવામાં આવી હતી. બોર્ડે એવું વલણ પણ અપનાવ્યું હતું કે ભારતીય ખેલાડીઓ આ ટુર્નામેન્ટમાં ન રમે તો જ તેઓ પોતાની ટીમને મેદાનમાં ઉતારશે. જોકે, આયોજકોએ સ્પષ્ટ વલણ અપનાવીને જણાવ્યું હતું કે આવી કોઈ પણ અયોગ્ય શરતો અન્ય ટીમો કે ખેલાડીઓ પર લાદી શકાય નહીં. વ્યવસાયિક બાબતો સિવાયની આવી તમામ શરતો નકારી કાઢીને આયોજકોએ પાકિસ્તાનને સ્પર્ધામાંથી બહાર કરવાનો કડક નિર્ણય લીધો હતો.
આ ટુર્નામેન્ટ ગત ૩ ઓક્ટોબરથી શરૂ થઈ ચૂકી છે, જેમાં પાકિસ્તાને પોતાની પ્રથમ મેચ બાંગ્લાદેશ સામે રમવાની હતી, પરંતુ વિવાદના કારણે ટીમ મેદાન પર ઉતરી શકી નહોતી. ત્યારબાદ ૫ ઓક્ટોબરના રોજ ઓસ્ટ્રેલિયા સામે નિર્ધારિત મેચ પણ રદ કરી દેવામાં આવી હતી. પૂર્વ આયોજન મુજબ આગામી ૧૦ ઓક્ટોબરે ભારત અને પાકિસ્તાન વચ્ચે મુકાબલો ખેલાવાનો હતો, પરંતુ હવે પાકિસ્તાનની બાદબાકી થતાં આ મેચ પણ આપોઆપ રદ થઈ ગઈ છે. આમ, ક્રિકેટના મેદાન પર રમત ભાવના દર્શાવવાને બદલે અયોગ્ય શરતો થોપવાનો પ્રયાસ કરનાર પાકિસ્તાનને ફરી એક વખત વૈશ્વિક મંચ પર નીચાજોણું થયું છે.
