અમૃતસર ગ્રામીણ પોલીસ દ્વારા કેન્દ્રીય એજન્સીના સહયોગથી હાથ ધરવામાં આવેલા એક ભગીરથ ઓપરેશનમાં આંતરરાષ્ટ્રીય સ્તરે સક્રિય હથિયાર અને ડ્રગ્સ દાણચોરીના નેટવર્કની કમર ભાંગી નાખવામાં આવી છે. આ સંયુક્ત કાર્યવાહી દરમિયાન પોલીસે ઘટનાસ્થળેથી અત્યંત ખતરનાક એવા આરપીજી (RPG) રોકેટ લોન્ચર સહિત આશરે ૮ કિલોગ્રામ હેરોઈન અને ૨ કિલોગ્રામથી વધુ આઈસ (મેથામ્ફેટામાઈન) ડ્રગ્સનો મોટો જથ્થો જપ્ત કર્યો છે. આ ઉપરાંત, ૫ કિલોગ્રામથી વધુ અફીણ, બે ગેરકાયદેસર પિસ્તોલ, ૧૦૬ જીવતા કારતૂસ, એક અત્યાધુનિક ડ્રોન, જીપીએસ ટ્રેકર અને પાંચ મોબાઈલ ફોન પણ કબ્જે કરવામાં આવ્યા છે, જે વિદેશી હેન્ડલર્સ સાથેના ઊંડા કાવતરા તરફ ઈશારો કરે છે.
પ્રાથમિક તપાસ દરમિયાન પંજાબ પોલીસે ખુલાસો કર્યો છે કે પકડાયેલા તમામ સાત આરોપીઓ વિદેશમાં બેઠેલા ગેંગસ્ટરો અને હેન્ડલર્સના સતત સંપર્કમાં હતા. આ વિદેશી હેન્ડલર્સ દ્વારા જ ભારતીય સરહદ પારથી ગેરકાયદેસર હથિયારો અને નાર્કોટિક્સનો જથ્થો મોકલવામાં આવતો હતો, જેથી દેશના અંદરના વિસ્તારોમાં સક્રિય અપરાધીઓ અને ગુનેગારો સુધી તેનો વ્યાપ વધારી શકાય. આરપીજી જેવા ઘાતક હથિયારની સાથે આધુનિક કોમ્યુનિકેશન અને ટ્રેકિંગ ડિવાઈસ મળવાથી આ સમગ્ર મામલાની ગંભીરતા અનેકગણી વધી ગઈ છે. સુરક્ષા એજન્સીઓ હાલ આ હથિયારનો ઉપયોગ ક્યાં થવાનો હતો અને તેના બેકવર્ડ-ફોર્વર્ડ કનેક્શન્સ કયા છે તેની ઊંડાણપૂર્વક તપાસ કરી રહી છે.
આ ગંભીર મામલે અમૃતસર જિલ્લાના ઘરિંડા, લોપોકે અને ભિંડી સૈદા પોલીસ સ્ટેશન ખાતે અલગ-અલગ એફઆઈઆર (FIR) નોંધવામાં આવી છે. પોલીસ ટીમો હવે આ સમગ્ર નેટવર્કના મૂળ સુધી પહોંચવા અને વિદેશી હેન્ડલર્સની ઓળખ કરવા માટે સઘન તપાસ ચલાવી રહી છે. પંજાબ પોલીસના જણાવ્યા અનુસાર, આ ઓપરેશનનો મુખ્ય ઉદ્દેશ્ય માત્ર આ જથ્થો પકડવાનો ન હતો, પરંતુ આ ગેરકાયદેસર સપ્લાય ચેઈનને જડમૂળથી ઉખડી ફેંકવાનો છે જેથી રાજ્યમાં શાંતિ અને સુરક્ષા જળવાઈ રહે.
