અમેરિકા અને ઈરાન વચ્ચે વર્તમાન સમયમાં ચરમસીમાએ પહોંચેલા રાજકીય અને લશ્કરી તણાવ વચ્ચે મધ્ય પૂર્વના સંવેદનશીલ જળમાર્ગ પર એક અત્યંત ગંભીર અને ચિંતાજનક ઘટના સામે આવી છે. સ્ટ્રેટ ઓફ હોર્મુઝની સમુદ્રી સીમામાંથી કોઈપણ પ્રકારની અધિકૃત મંજૂરી વગર પસાર થઈ રહેલા ત્રણ વિશાળ ઓઈલ ટેન્કરોમાં એકપછી એક ભયાનક વિસ્ફોટો થયા હતા. આ વિસ્ફોટો એટલા શક્તિશાળી હતા કે ત્રણેય જહાજો થોડી જ ક્ષણોમાં ભડભડ કરીને આગની લપેટમાં આવી ગયા હતા અને બળીને ખાખ થઈ ગયા હતા. ઈરાની સત્તાવાળાઓના દાવા મુજબ આ ટેન્કરો આંતરરાષ્ટ્રીય દરિયાઈ સુરક્ષાના તમામ નિયમોને ઘોળીને પીને અત્યંત જોખમી અને અનધિકૃત માર્ગેથી આગળ વધી રહ્યા હતા, જેને કારણે તેમની સામે આ કડક કાર્યવાહી કરવામાં આવી છે.
ઈસ્લામિક રિવોલ્યુશનરી ગાર્ડ કોર્પ્સ (IRGC) સાથે જોડાયેલી સત્તાવાર એજન્સી દ્વારા પ્રાપ્ત વિગતો અનુસાર, આ ટેન્કરો જ્યારે હોર્મુઝ ક્ષેત્ર પાર કરી રહ્યા હતા ત્યારે તેમણે પોતાની તમામ નેવિગેશન અને આઈડેન્ટિફિકેશન સિસ્ટમ એટલે કે ઓળખ પ્રણાલીઓ જાણી જોઈને બંધ કરી દીધી હતી જેથી તેમની અવરજવર છૂપી રહી શકે. આમાંથી બે જહાજો સમુદ્રમાં અગાઉથી બિછાવવામાં આવેલી બારૂદી સુરંગો એટલે કે સમુદ્રી માઈન્સની ચપેટમાં આવી જતાં ધડાકા સાથે ફાટી નીકળ્યા હતા. જ્યારે ત્રીજું ઓઈલ ટેન્કર અમેરિકન લડાયક વિમાનોની કવચ અને મદદ લઈને ચોરીછૂપીથી રસ્તો કાપવાનો નિરર્થક પ્રયાસ કરી રહ્યું હતું, પરંતુ તે પણ જળચર સુરંગ સાથે અથડાતા તેમાં પણ ભીષણ આગ ફાટી નીકળી હતી અને જહાજને ભારે નુકસાન થયું હતું.
આ ગંભીર વિસ્ફોટોની ઘટના બાદ ઈરાની નૌસેના અને IRGC દ્વારા ખુલ્લી ચેતવણી ઉચ્ચારવામાં આવી છે કે હોર્મુઝનો આ જળમાર્ગ હવે કોઈપણ પ્રકારના અનધિકૃત અને ગેરકાયદેસર પ્રવેશ માટે સંપૂર્ણપણે અસુરક્ષિત છે. ઈરાને સ્પષ્ટ શબ્દોમાં જણાવ્યું છે કે અમેરિકન સૈન્યની મિલીભગત કે સહયોગથી આ પ્રકારે ગેરકાયદેસર રીતે સરહદ ઓળંગવાનો પ્રયાસ કરનાર દરેક જહાજનું ભાવિ આના જેવું જ થશે. ઉલ્લેખનીય છે કે અમેરિકા અને ઈઝરાયેલ સાથે ચાલી રહેલા યુદ્ધના માહોલ બાદ ઈરાને આ વ્યૂહાત્મક રીતે મહત્વપૂર્ણ એવા હોર્મુઝ સ્ટ્રેટ પર પોતાની સૈન્ય પકડ અત્યંત મજબૂત બનાવી દીધી છે અને વિરોધી દેશોના જહાજો માટે આ માર્ગ કાયમ માટે સીલ કરી દીધો છે.
