કોંગ્રેસના પૂર્વ અધ્યક્ષ સોનિયા ગાંધીએ પોતાની તાજેતરમાં પ્રકાશિત થયેલી આત્મકથા 'બિલોંગિંગ: અ જર્ની ઓફ લવ' દ્વારા પોતાના જીવનના કેટલાક અત્યંત અંગત અને સંઘર્ષમય પાસાઓ દુનિયા સામે મૂક્યા છે. પુસ્તકમાં જણાવ્યા અનુસાર, વર્ષ ૨૦૧૦માં યુપીએ સરકારના બીજા કાર્યકાળ દરમિયાન તેમના પર સ્તન કેન્સર (બ્રેસ્ટ કેન્સર)ની સર્જરી કરવામાં આવી હતી. આ સમયગાળો તેમના માટે માત્ર રાજકીય રીતે જ નહીં પરંતુ વ્યક્તિગત સ્તરે પણ ભારે માનસિક અને શારીરિક આઘાતજનક હતો, કારણ કે અગાઉ તેમને માત્ર અસ્થમા, એલર્જી કે સામાન્ય પેટની તકલીફો જ રહેતી હતી પરંતુ રાજકીય જવાબદારીઓના વધતા તણાવ સાથે સ્વાસ્થ્ય સંબંધી ગંભીર મુશ્કેલીઓ શરૂ થઈ હતી.
મીડિયા અને પબ્લિસિટીથી દૂર રહીને પોતાની પ્રાઇવસી જાળવવાની ઇચ્છાને કારણે સોનિયા ગાંધીએ ભારતીય હોસ્પિટલોને બદલે મિલન (ઇટાલી) ખાતે યુરોપિયન ઇન્સ્ટિટ્યુટ ઓફ ઓન્કોલોજીમાં સર્જરી કરાવવાનો નિર્ણય કર્યો હતો. આ મુશ્કેલ સમયમાં રાહુલ ગાંધી, પ્રિયંકા ગાંધી, રોબર્ટ વાડ્રા અને તેમના નજીકના સ્વજનો તેમની સાથે રહ્યા હતા. પ્રખ્યાત સર્જન ડૉ. ઉમ્બર્ટો વેરોનેસીના માર્ગદર્શન હેઠળ સફળ ઓપરેશન પાર પડ્યું હતું, જેમાં સમયસર ટ્યુમર દૂર કરીને તેમને લાંબી રેડિયોથેરાપીમાંથી બચાવી લેવામાં આવ્યા હતા. જો કે, આ ભયમાંથી માંડ બહાર આવ્યા તેના બરાબર એક વર્ષ બાદ, નિયમિત તપાસ દરમિયાન તેમના સ્વાદુપિંડ (પાનક્રિયાસ)માં વધુ એક શંકાસ્પદ ગાંઠ મળી આવતા તેમના પરિવાર પર જાણે આભ તૂટી પડ્યું હતું.
બીજી વખત કેન્સરનું જોખમ ઊભું થતાં સોનિયા ગાંધી ભારે ચિંતામાં મુકાઈ ગયા હતા અને તેમણે નેધરલેન્ડ્સના રોટરડેમ ખાતે આવેલા ઇરેસ્મુસ યુનિવર્સિટી મેડિકલ સેન્ટરમાં ખ્યાતનામ પેન્ક્રિયાટિક સર્જન ડૉ. કેસ્પર વાન ફાઇજ્ક પાસે સારવાર લીધી હતી. સદભાગ્યે, આ બીજી ગાંઠ પ્રારંભિક અને પૂર્વ-કેન્સર અવસ્થામાં જ ઝડપાઈ ગઈ હોવાથી સમયસરની સારવારથી તેમનો જીવ બચી ગયો હતો. આ અત્યંત ગુપ્ત અને સંવેદનશીલ ઓપરેશન વિશે તે સમયે તત્કાલીન વડાપ્રધાન મનમોહન સિંહ અને માત્ર ગણતરીના વરિષ્ઠ સહયોગીઓ જ જાણતા હતા. કેન્સર જેવી બે મોટી બીમારીઓને મ્હાત આપનાર સોનિયા ગાંધીનો આ સંઘર્ષ અહેવાલ દર્શાવે છે કે વિપરીત પરિસ્થિતિઓમાં પણ માનસિક મજબૂતાઈ અને પરિવારનો સાથ માણસને કેવી રીતે અડગ રાખી શકે છે.
