છત્તીસગઢના બસ્તર ખાતે સુરક્ષાદળો સાથે દિવાળીની ઉજવણી દરમિયાન વડાપ્રધાન નરેન્દ્ર મોદીએ સશસ્ત્ર નક્સલવાદના ખાતમાની સાથે જ 'દિમાગી નક્સલીઓ'નો મુદ્દો ઉઠાવ્યો હતો. વડાપ્રધાને જણાવ્યું હતું કે જંગલોમાંથી હથિયારધારી નક્સલવાદીઓનો સફાયો થઈ ચૂક્યો છે, પરંતુ હવે આ 'દિમાગી નક્સલીઓ' વિવિધ સંસ્થાઓ અને રાજકીય પક્ષોમાં ઘૂસીને બંધારણ અને લોકશાહી વિરુદ્ધ લોકોને ઉશ્કેરી રહ્યા છે. તેમણે આ છૂપા જોખમને ઓળખીને દેશની સુરક્ષા માટે તેને જડમૂળથી નેસ્તનાબૂદ કરવા પર ભાર મૂક્યો હતો.
વડાપ્રધાનના આ નિવેદન બાદ લોકસભામાં વિરોધ પક્ષના નેતા રાહુલ ગાંધીએ સોશિયલ મીડિયા પર સીધો હુમલો કરતા સીઆરપીએફના જવાનોની પ્રતિક્રિયાઓ ટાંકીને પીએમ મોદીના દાવા સામે સવાલો ઉઠાવ્યા હતા. રાહુલે પડકાર ફેંક્યો હતો કે રાષ્ટ્રવિરોધી કોણ છે અને વિદેશી તાકાતોના નિયંત્રણમાં કોણ છે તે અંગે કોઈપણ સમયે અને કોઈપણ જગ્યાએ તેમની સાથે ચર્ચા કરવામાં આવે. આ રાજકીય વાદ-વિવાદ વચ્ચે કેન્દ્રીય મંત્રી કિરેન રિજિજુએ રાહુલ ગાંધી પર વળતો પ્રહાર કરતા કહ્યું કે કોંગ્રેસ શાસન દરમિયાન જ ડૉ. મનમોહન સિંહે ડાબેરી ઉગ્રવાદને દેશની આંતરિક સુરક્ષા સામેનો સૌથી મોટો પડકાર ગણાવ્યો હતો.
કિરેન રિજિજુએ સોશિયલ મીડિયા પર સ્પષ્ટ શબ્દોમાં જણાવ્યું હતું કે સશસ્ત્ર માઓવાદીઓને ખતમ કરવા બદલ રાહુલ ગાંધીએ વડાપ્રધાન મોદીનો આભાર માનવો જોઈએ. તેમણે વધુમાં ઉમેર્યું હતું કે હવે સરકારનું આગામી લક્ષ્ય દેશની વિવિધ સંસ્થાઓ અને પક્ષોમાં બેઠેલા આ 'દિમાગી નક્સલીઓ'ને સંપૂર્ણપણે ખતમ કરવાનું છે. કેન્દ્ર સરકારે ગત ૩૧ માર્ચે જ દેશને નક્સલવાદના ખતરાથી મુક્ત જાહેર કર્યો હતો, પરંતુ હવે બૌદ્ધિક અને માનસિક સ્તરે ફેલાયેલા આ નવા જોખમ સામે રાજકીય ગરમાવો વધુ તીવ્ર બન્યો છે.
