જ્યોતિષશાસ્ત્રમાં ગ્રહોના સેનાપતિ ગણાતા મંગળ દેવે મિથુન રાશિમાંથી નીકળીને કર્ક રાશિમાં ગોચર કર્યું છે. મંગળ ગ્રહ આગામી ૧૨ નવેમ્બર સુધી કર્ક રાશિમાં જ બિરાજમાન રહેશે. ખાસ બાબત એ છે કે કર્ક રાશિમાં દેવગુરુ બૃહસ્પતિ પણ વિદ્યમાન હોવાથી ત્યાં ગુરુ અને મંગળનો વિશેષ સંયોગ રચાયો છે. વૈદિક જ્યોતિષ મુજબ કર્ક રાશિમાં મંગળ નીચ રાશિસ્થ અને ગુરુ ઉચ્ચ રાશિસ્થ ગણાય છે, જેના કારણે અત્યંત શક્તિશાળી 'નીચભંગ રાજયોગ'નું નિર્માણ થઈ રહ્યું છે. આ વિશિષ્ટ ગ્રહદશા આગામી દિવસોમાં કેટલીક રાશિઓના જાતકો માટે વિશેષ ફળદાયી અને સુવર્ણ અવસર સમાન સાબિત થઈ શકે છે.
આ ગોચર દરમિયાન મેષ રાશિના જાતકોને કારકિર્દી ક્ષેત્રે મોટો ફાયદો થવાના પ્રબળ સંકેત છે. કાર્યક્ષેત્રમાં વરિષ્ઠ અધિકારીઓનો સહકાર મળવાની સાથે નવી મહત્વપૂર્ણ જવાબદારીઓ પ્રાપ્ત થશે અને આર્થિક સ્થિતિ વધારે મજબૂત બનશે. વૃષભ રાશિના જાતકો માટે પણ આ સમયગાળો લાભદાયી રહેશે, ખાસ કરીને સ્પર્ધાત્મક પરીક્ષાઓની તૈયારી કરતા વિદ્યાર્થીઓ અને નવી નોકરીની શોધમાં રહેલા લોકોને ભાગ્યનો સાથ મળશે. બીજી તરફ, સિંહ રાશિના જાતકો માટે આ ગોચર નાણાકીય લાભ તેમજ વિદેશ સંબંધિત કામગીરીમાં પ્રગતિના દ્વાર ખોલી શકે છે. આ રાશિના જાતકો માટે આવકના નવા સ્ત્રોત ઊભા થવાની શક્યતા છે.
કન્યા રાશિના જાતકો માટે આ પરિવર્તન આવકમાં વૃદ્ધિ અને નવી વ્યાવસાયિક તકો લઈને આવશે, જે લાંબાગાળે કારકિર્દીને મજબૂતી પ્રદાન કરશે. તુલા રાશિના લોકોને લાંબા સમયથી ફસાયેલા કે અટકેલા નાણાં પરત મળી શકે છે અને કાર્યસ્થળે તેમની કામગીરી તથા નેતૃત્વ ક્ષમતાની સરાહના થશે. આ ઉપરાંત વૃશ્ચિક રાશિના જાતકો માટે મંગળનું આ ભ્રમણ આકસ્મિક આર્થિક લાભ કરાવનારું બની શકે છે. પરિવારના સંપૂર્ણ સહયોગ સાથે અટવાયેલી સ્થાવર મિલકત કે વાહન ખરીદીના કાર્યો પણ સરળતાથી પાર પડશે. આમ, આ ગોચર છ રાશિઓના જાતકો માટે સકારાત્મક પરિવર્તન લાવશે.
