સેન્ટ્રલ પોલ્યુશન કંટ્રોલ બોર્ડ (CPCB)ના આંકડા મુજબ, આ વર્ષે દીવાળીના દિવસે દિલ્હીનો એકંદર AQI ૩૭૬ નોંધાયો હતો, જે ૨૦૨૧ પછીનો સૌથી ખરાબ આંકડો છે. સોમવારે સવારે ૧૦ વાગ્યે પણ સ્થિતિ યથાવત રહી હતી અને AQI ૩૭૧ પર અકબંધ રહ્યો હતો. શહેરના કુલ ૫૧ મોનિટરિંગ સ્ટેશનોમાંથી ૧૪ સ્ટેશનો પર હવાની ગુણવત્તા 'ગંભીર' (Severe) શ્રેણીમાં જ્યારે ૩૩ સ્ટેશનો પર 'ખૂબ જ ખરાબ' શ્રેણીમાં નોંધાઈ હતી. ખાસ કરીને દિલ્હી ટેક્નોલોજીકલ યુનિવર્સિટી (DTU) ખાતે સૌથી ખરાબ સ્થિતિ જોવા મળી હતી જ્યાં AQI ૪૩૯ સુધી પહોંચી ગયો હતો. સ્વિસ એર ક્વોલિટી પ્લેટફોર્મ IQAir અને અન્ય રિયલ-ટાઇમ ડેટાએ પણ દિલ્હીની હવાને અત્યંત અસ્વાસ્થ્ય અને જોખમી જાહેર કરી છે, જેમાં PM2.5 નું પ્રમાણ વિશ્વ આરોગ્ય સંસ્થા (WHO)ના નિર્ધારિત માર્ગદર્શકો કરતા અનેક ગણું વધારે હોવાનું સામે આવ્યું છે.
હવાની આ અત્યંત ખરાબ સ્થિતિની સાથે સોમવારે સવારે દિલ્હીવાસીઓએ ગાઢ ધુમ્મસ અને સ્મોગનો સામનો કરવો પડ્યો હતો. ભારત મોસમી વિભાગ (IMD)ના જણાવ્યા અનુસાર, સફરજંગ સ્ટેશન પર વહેલી સવારે વિઝિબિલિટી ઘટીને માત્ર ૫૦ મીટર સુધી પહોંચી ગઈ હતી, જ્યારે પાલમ વિસ્તારમાં તે ૪૦૦ મીટર નોંધાઈ હતી. હવામાન નિષ્ણાતોના મતે શુષ્ક વાતાવરણ, હવાની મંદ ગતિ અને પડોશી રાજ્યોમાં પરાળ દહનની મોસમને કારણે પ્રદૂષણ ફેલાવતા કણો વાતાવરણમાં જ જકડાઈ રહ્યા છે, જેના કારણે પ્રદૂષણના સ્તરમાં ઘટાડો થવાનું નામ નથી લઈ રહ્યું.
તંત્ર દ્વારા ગ્રીન ફટાકડાના વેચાણ અને મર્યાદિત સમય માટે જ ફોડવાના કડક નિયમો બનાવવામાં આવ્યા હોવા છતાં, દિલ્હીના પિતામપુરા, બુરારી, મયૂર વિહાર અને લુટિયન્સ દિલ્હી સહિતના અનેક વિસ્તારોમાં નિર્ધારિત સમય મર્યાદા ઉપરાંત પણ મોટા પ્રમાણમાં ફટાકડા ફોડવામાં આવ્યા હતા. એર ક્વોલિટી અર્લી વોર્નિંગ સિસ્ટમ (EWS)ના અહેવાલ મુજબ આગામી કેટલાક દિવસો સુધી પ્રદૂષણનું આ ગંભીર સ્તર જળવાઈ રહેવાની સંભાવના છે. વાહનોના ધુમાડા, પ્રતિકૂળ હવામાન અને ફટાકડાના ધુમાડાને કારણે નાગરિકોને શ્વાસ લેવામાં ભારે મુશ્કેલીનો સામનો કરવો પડી રહ્યો છે, જેના પગલે તંત્ર દ્વારા સતર્કતા વધારી દેવામાં આવી છે.
