વૈશ્વિક ટેકનોલોજી જગતમાં હલચલ મચાવતા અહેવાલો અનુસાર, ચીની ગુપ્તચર તંત્ર દ્વારા નિયુક્ત કરાયેલી હોવાનું શંકાસ્પદ એવી બિઝનેસવુમન એલિસ હુઆંગ સાથે એનવીડિયાના CEO જેેનસેન હુઆંગ ઘનિષ્ઠ સંબંધોમાં આવ્યા હોવાનું સામે આવ્યું છે. 'ફાઇનાન્શિયલ ટાઇમ્સ' અને 'ધ ન્યૂ યોર્ક ટાઇમ્સ'ના અહેવાલો મુજબ, અમેરિકી ગુપ્તચર એજન્સીઓએ આ કથિત રોમાન્સ પાછળ ચીનની જાસૂસી ઓપરેશનની શંકા વ્યક્ત કરી છે. યુએસ સરકારના કેટલાક વરિષ્ઠ અધિકારીઓ સમક્ષ આ મામલે એક ગુપ્ત મેમો પણ રજૂ કરવામાં આવ્યો છે, જે દર્શાવે છે કે કેવી રીતે અમેરિકાના સૌથી પ્રભાવશાળી ટેક અગ્રણીને નિશાન બનાવવામાં આવ્યા હોઈ શકે છે. આ બંને વચ્ચેના સંબંધોની શરૂઆત જૂન ૨૦૨૪માં તાઇપાઈની એક બારમાં સાથે વિતાવેલી સાંજથી થઈ હોવાનું મનાઈ રહ્યું છે, ત્યારબાદ મે ૨૦૨૫માં તાઈવાનમાં યોજાયેલી કોમ્પ્યુટેક્સ પ્રદર્શન દરમિયાન પણ બંને જાહેરમાં સાથે નજરે પડ્યા હતા.
આ સમગ્ર વિવાદનું બીજું અને વધુ ગંભીર પાસું એલિસ હુઆંગની સિંગાપોર સ્થિત કંપની 'મેગાસ્પીડ ઇન્ટરનેશનલ' સાથે જોડાયેલું છે, જે એનવીડિયાના ક્લાઉડ બિઝનેસની કોર પાર્ટનર છે. આ કંપનીએ છેલ્લા બે વર્ષમાં અબજો ડોલરના એનવીડિયાના હાઇ-એન્ડ AI પ્રોસેસર્સની ખરીદી કરી છે, જેના કારણે તે અગાઉથી જ અમેરિકી સરકારની કડક નજરમાં હતી. યુએસ રેગ્યુલેટર્સને આશંકા છે કે પ્રતિબંધિત આધુનિક AI ટેકનોલોજી અને ચીપ્સ ચીન તરફ વાળવામાં આ કંપની અને એલિસ હુઆંગની મુખ્ય ભૂમિકા રહી શકે છે. જો કે, મેગાસ્પીડ દ્વારા ગેરરીતિના તમામ આરોપોને નકારી કાઢવામાં આવ્યા છે અને એનવીડિયાએ પણ આ અંગે અગાઉ કોઈ ગેરરીતિ ન થઈ હોવાનું જણાવ્યું હતું, પરંતુ આ કથિત કનેક્શને વૈશ્વિક ટેક માર્કેટમાં સનસનાટી મચાવી દીધી છે.
આ ગંભીર આરોપો અને રાષ્ટ્રીય સુરક્ષાની ચિંતાઓ વચ્ચે, ૬૩ વર્ષીય એનવીડિયા ચીફ જેેનસેન હુઆંગે જાહેરમાં પોતાના પરિવાર અને સહકર્મીઓની માફી માંગી છે અને પોતાના અંગત વર્તનની જવાબદારી સ્વીકારી છે. તેમણે સ્પષ્ટ કર્યું છે કે તેમની પત્ની અને બાળકોનો આ મામલે કોઈ દોષ નથી અને આ તમામ નિર્ણયો માત્ર તેમના પોતાના જ છે. સાથે જ, એનવીડિયાના બોર્ડ ઓફ ડિરેક્ટર્સે આ સમગ્ર મામલે સ્વતંત્ર તપાસ શરૂ કરી છે, જેને જેેનસેન હુઆંગે સંપૂર્ણ સમર્થન આપવાની અને સહકાર આપવાની જાહેરાત કરી છે. તેમણે પોતાની ભૂલ સ્વીકારવાની સાથે દેશ અને કંપની પ્રતિ પોતાની વફાદારી દોહરાવી છે, પરંતુ આ હાઇ-પ્રોફાઇલ જાસૂસી કૌભાંડ આગામી સમયમાં અમેરિકા-ચીન ટેક વૉર અને કોર્પોરેટ ગવર્નન્સ પર ઊંડી અસરો છોડી શકે છે.
