દિવાળીના પવિત્ર તહેવાર નિમિત્તે વિશ્વભરના રાજકીય નેતાઓએ સીમાઓ અને ધર્મોના ભેદભાવને ભૂલીને શાંતિ, એકતા અને સમૃદ્ધિનો સંદેશ આપ્યો છે. ફ્રાન્સના રાષ્ટ્રપતિ ઇમેન્યુઅલ મેક્રોન, ઓસ્ટ્રેલિયાના વડાપ્રધાન એન્થોની અલ્બેનિસ અને કેનેડાના માર્ક કાર્ની સહિત અનેક વૈશ્વિક નેતાઓએ સોશિયલ મીડિયાના માધ્યમથી ભારતીયો અને વિશ્વભરમાં દિવાળી ઉજવતા સમુદાયોને હાર્દિક શુભેચ્છાઓ પાઠવી હતી. રાષ્ટ્રપતિ મેક્રોને હિન્દી અને અંગ્રેજીમાં સંદેશ પાઠવતા જણાવ્યું હતું કે આ પ્રકાશ પર્વ આપણને હંમેશાં એકતા, શાંતિ અને આશાની જ્યોત જાળવી રાખવાની પ્રેરણા આપે છે. જ્યારે ઓસ્ટ્રેલિયન વડાપ્રધાને દીપોત્સવને સાંસ્કૃતિક સીમાઓ પાર કરીને લોકોને જોડતો મહાન ઉત્સવ ગણાવ્યો હતો.
આ વૈશ્વિક ઉજવણીમાં એશિયા, મધ્યપૂર્વ અને પશ્ચિમના દેશો પણ ઉત્સાહભેર જોડાયા હતા. સંયુક્ત આરબ અમીરાતના રાષ્ટ્રપતિ શેખ મોહમ્મદ બિન જાયેદ, શ્રીલંકાના રાષ્ટ્રપતિ અનુરા કુમારા દિસાનાયકે અને પાકિસ્તાનના વડાપ્રધાન શહેબાઝ શરીફ તેમજ રાષ્ટ્રપતિ આસિફ અલી ઝરદારીએ પણ હિન્દુ સમુદાયને શુભેચ્છા પાઠવી હતી. શ્રીલંકાના રાષ્ટ્રપતિએ માનવતા અને પરસ્પર પ્રેમની દીવાળી ઉજવવાની હિમાયત કરી હતી, તો પાકિસ્તાની નેતાઓએ ઘૃણા અને અસહિષ્ણુતાના અંધકાર પર પ્રકાશના વિજયની વાત પર ભાર મૂક્યો હતો. ઇઝરાયેલના રાષ્ટ્રપતિ આઈઝેક હરજોગે પણ ભારતની જનતાને શાંતિ અને સમૃદ્ધિની શુભકામનાઓ પાઠવી હતી. આ ઉપરાંત, થાઈલેન્ડમાં બેંગકોક ખાતે ૨૭ દિવસ સુધી ચાલનારા ભવ્ય 'એમેઝિંગ થાઈલેન્ડ ગ્રાન્ડ દિવાળી ફેસ્ટિવલ ૨૦૨૬'નો શુભારંભ કરાયો હતો, જે ભારત બહાર યોજાતો સૌથી લાંબો દિવાળી મહોત્સવ બન્યો છે.
અમેરિકાથી લઈને સેશેલ્સ અને મલેશિયા સુધીના દેશોમાં ભારતીય પ્રવાસીઓ અને સ્થાનિક સરકારો દ્વારા દિવાળીના તહેવારને વિશેષરૂપે ઉજવવામાં આવ્યો હતો. અમેરિકાના રાષ્ટ્રપતિ ડોનાલ્ડ ટ્રમ્પે વ્હાઈટ હાઉસના ઓવલ ઓફિસમાં દી પ્રાગટ્ય કરીને ભારતીય-અમેરિકન સમુદાય સાથે આ પર્વની ઉજવણી કરી હતી. મલેશિયાના વડાપ્રધાન અનવર ઇબ્રાહિમે વિવિધતામાં એકતા અને પરસ્પર આદરના મહત્વ પર ભાર મૂક્યો હતો, જ્યારે સેશેલ્સના રાષ્ટ્રપતિએ દેશના આર્થિક અને સામાજિક વિકાસમાં ભારતીય સમુદાયના યોગદાનને બિરદાવ્યું હતું. આમ, દિવાળીનો આ તહેવાર વૈશ્વિક સ્તરે માનવતા, સદ્ભાવના અને આશાનું પ્રતિક બનીને સમગ્ર વિશ્વના નેતાઓને એક મંચ પર લઈ આવ્યો હતો.
