ઇજિપ્તના ગીઝા પ્રાંતના અલ-અય્યાત જિલ્લામાં, જે કાૈરોથી લગભગ ૫૨ કિલોમીટર દક્ષિણમાં આવેલો છે, રવિવારે એક ભયાનક રેલ અકસ્માત સર્જાયો હતો. પરિવહન મંત્રાલયના જણાવ્યા અનુસાર, દક્ષિણ તરફ જતી અસવાન ટ્રેનને ફયુમ પ્રાંત તરફ જઈ રહેલી અન્ય એક ટ્રેને પાછળથી ટક્કર મારી હતી, જેના કારણે આ ગમખ્વાર અકસ્માત થયો હતો. આ ટક્કર એટલી જોરદાર હતી કે ટ્રેનના ડબ્બા પાટા પરથી ઉતરી ગયા હતા, જેના કારણે મુસાફરોમાં ભારે નાસભાગ અને ગભરાટ ફેલાઈ ગયો હતો.
ઘટનાની જાણ થતાં જ સ્વાસ્થ્ય મંત્રાલય અને રેલવે સત્તાવાળાઓ દ્વારા ત્વરિત પગલાં લેવામાં આવ્યા હતા. રાહત અને બચાવ ટીમો તાત્કાલિક ઘટનાસ્થળે દોડી આવી હતી અને કાટમાળ હટાવવાની કામગીરી શરૂ કરી હતી. સ્વાસ્થ્ય મંત્રાલયના સત્તાવાર આંકડા મુજબ આ દુર્ઘટનામાં ચાર લોકોના પ્રાણ ગયા છે, જ્યારે 88 જેટલા ગંભીર રીતે ઘાયલ થયેલા મુસાફરોને સારવાર માટે તાત્કાલિક નજીકની હોસ્પિટલોમાં ખસેડવામાં આવ્યા છે, જ્યાં તેમની સારવાર ચાલી રહી છે.
આ ગંભીર દુર્ઘટનાની ગંભીર નોંધ લેતા ઇજિપ્તના રાષ્ટ્રપતિ અબ્દુલ ફતાહ અલ-સિસીએ સોશિયલ મીડિયાના માધ્યમથી સમગ્ર ઘટનાની ત્વરિત અને નિષ્પક્ષ તપાસના આદેશ આપ્યા છે. તેમણે સ્પષ્ટ કર્યું છે કે આ અકસ્માત માટે જવાબદાર તમામ દોષિતો સામે કડક કાનૂની કાર્યવાહી કરવામાં આવશે. બીજી તરફ, રેલવે ઓથોરિટી દ્વારા ટ્રેન વ્યવહારને વહેલી તકે પૂર્વવત કરવા માટે ક્રેન અને અત્યાધુનિક સાધનોની મદદથી યુદ્ધના ધોરણે કામગીરી હાથ ધરવામાં આવી રહી છે.
