ભરૂચ શહેરના ધમધમતા ભોલાવ જીઆઈડીસી વિસ્તારમાં દીપડાની હાજરીએ ફરી એકવાર લોકોની ઊંઘ હરામ કરી દીધી છે. અગાઉ પણ આ જ વિસ્તારમાંથી એક દીપડો રસ્તો ક્રોસ કરતો હોવાના સીસીટીવી ફૂટેજ વાયરલ થયા હતા, ત્યારબાદ વન વિભાગ દ્વારા વ્યાપક તપાસ હાથ ધરવામાં આવી હતી પરંતુ દીપડો પકડાયો ન હતો. તાજેતરમાં જીઆઈડીસીમાં આવેલી મોજા બનાવતી મહાવીર કંપનીના સંકુલમાં ફરીથી દીપડો નજરે પડતા આસપાસના ઉદ્યોગકારો, વેપારીઓ અને કામદારોમાં ભયનો માહોલ છવાઈ ગયો છે. અવારનવાર બનતી આવી ઘટનાઓથી નાગરિકો સુરક્ષાને લઈને ચિંતિત બન્યા છે.
વિકાસના નામે કુદરતી વન્ય વિસ્તારો સતત નાશ પામી રહ્યા છે અને જંગલો સંકોચાતા જઈ રહ્યા છે, જેના કારણે વન્યજીવો પોતાની કુદરતી આవాસ ગુમાવી રહ્યા છે. બીજી તરફ, જંગલોમાં દીપડાઓ માટેની ભોજન શૃંખલા પણ જોખમાઈ છે, જેના પરિણામે તેઓ હવે સરળ શિકારની શોધમાં માનવ વસ્તી તરફ પ્રયાણ કરી રહ્યા છે. શહેરી વિસ્તારોમાં રખડતા શ્વાન અને પશુઓ આસાન શિકાર બનતા હોવાથી આ ખૂંખાર વન્યજીવો ઔદ્યોગિક વસાહતો અને સોસાયટીઓ સુધી પહોંચી રહ્યા છે. જોકે, આ સ્થિતિમાં નાના બાળકો અને રાહદારીઓ ઉપર ગંભીર હુમલાનું જોખમ પણ વધી ગયું છે જેને નકારી શકાય તેમ નથી.
ભોલાવ જીઆઈડીસી એ એક એવો વિસ્તાર છે જ્યાં રોજના હજારો શ્રમિકો અને લોકોની અવરજવર રહેતી હોય છે, પરંતુ રાત્રિના કે વહેલી સવારે માર્ગો સુમસામ થઈ જાય છે. આવા સમયે એકલ-દોકલ વ્યક્તિ પર દીપડો હુમલો કરે તેવી દહેશત સ્થાનિકો દ્વારા સતત વ્યક્ત થઈ રહી છે. અગાઉ વન વિભાગ દ્વારા લોકોને સાવચેતી રાખવા અને સુમસાન માર્ગો પર એકલા ન જવાની સૂચનાઓ અપાઈ હતી, પરંતુ હવે ફરી દીપડો દેખાતા વન વિભાગ દ્વારા ત્વરિત અને સઘન કાર્યવાહી કરવામાં આવે તેવી લોકમાગ ઉઠી છે. ઉદ્યોગકારો અને કામદારોની સુરક્ષાને ધ્યાનમાં રાખીને પિંજરા ગોઠવીને આ દીપડાને વહેલી તકે પકડી લેવામાં આવે તે અત્યંત આવશ્યક બન્યું છે.
