વિશ્વભરમાં એઆઈ અર્થાત્ આર્ટિફિશિયલ ઇન્ટેલિજન્સના સૌથી મોટા સમર્થક અને અગ્રણી રોકાણકાર સોફ્ટબેન્કના વડા માસાયોશી સોને આ નવીન ટેકનોલોજીના વધતા જોખમો અંગે સમગ્ર વિશ્વને ગંભીર ચેતવણી આપી છે. જાપાનના ક્યોટો શહેરમાં આયોજિત વિજ્ઞાન અને ટેકનોલોજી પરિષદ દરમિયાન તેમણે જણાવ્યું હતું કે, મશીનો ઝડપથી માનવીય ક્ષમતાઓને વટાવી રહ્યા છે ત્યારે સુપરઇન્ટેલિજન્સ જો ખોટા હાથોમાં જશે તો તે માનવજાત માટે અત્યંત ઘાતક સાબિત થઈ શકે છે. હવે માનવીઓ અંદરોઅંદર સંઘર્ષ કરે તે પોસાય તેમ નથી, કારણ કે આ અતિશક્તિશાળી કમ્પ્યુટર મોડેલો સામે રક્ષણ મેળવવા તમામ દેશોએ પરસ્પર વિશ્વાસ કેળવીને સાથે મળીને નિયમન કરવું અનિવાર્ય બન્યું છે.
ચેટજીપીટી બનાવનારી સંસ્થા ઓપનએઆઈ સહિત અનેક ટેકનોલોજી સાહસોમાં આશરે ૬૫ અબજ ડોલરનું જંગી રોકાણ કરનારા ૬૯ વર્ષીય જાપાની અબજોપતિ માસાયોશી સોન અત્યાર સુધી આ ટેકનોલોજીના વિકાસના સૌથી મોટા હિમાયતી રહ્યા છે. જોકે, તાજેતરના સમયમાં સુરક્ષા સંબંધિત કેટલીક ચિંતાજનક ક્ષતિઓ સામે આવ્યા બાદ તેમના વલણમાં આ નોંધપાત્ર ફેરફાર જોવા મળ્યો છે. તેમણે સ્પષ્ટ કર્યું કે ચેટબોટથી શરૂ થયેલી આ ટેકનોલોજી હવે કોડિંગ અને માહિતી વિશ્લેષણમાં અગ્રેસર બની ચૂકી છે અને આગામી વર્ષથી તે ભૌતિક જગતમાં રોબોટ્સ અને અન્ય યંત્રો સાથે સીધો સંવાદ સાધીને કામ કરવા સક્ષમ બની જશે, જે આ ક્ષેત્રમાં ત્રીજો મોટો તબક્કો હશે.
આ મહત્વપૂર્ણ કાર્યક્રમમાં અમેરિકાના વ્હાઇટ હાઉસના નીતિ સલાહકાર માઇકલ ક્રેટ્સિઓસે વૈજ્ઞાનિક સંશોધનોને ગતિ આપવા માટે અમેરિકાના નેતૃત્વ હેઠળ ૧૭ દેશોના વૈશ્વિક ગઠબંધનની જાહેરાત કરી હતી. જેમાં જાપાન, દક્ષિણ કોરિયા, બ્રિટન, જર્મની, સિંગાપોર અને સંયુક્ત આરબ અમીરાત જેવા દેશો જોડાયા છે, જ્યારે ચીનનો તેમાં સમાવેશ કરાયો નથી. આ પહેલ હેઠળ સ્વચાલિત પ્રયોગશાળાઓમાં રોબોટિક સિસ્ટમ્સ દ્વારા હજારો પ્રયોગો સમાંતર રીતે થશે, જેનાથી સંશોધકોનું વર્ષોનું જટિલ કામ ડિજિટલ એજન્ટોની મદદથી માત્ર ગણતરીના કલાકોમાં પૂર્ણ થશે. જોકે, આ અભૂતપૂર્વ વૈજ્ઞાનિક ક્રાંતિ વચ્ચે તેના દુરુપયોગને અટકાવવા માટે વૈશ્વિક સ્તરે સુરક્ષા નિયમો ઘડવા હવે અત્યંત જરૂરી બન્યા છે.
