અમેરિકાના અગ્રણી અખબારોના અહેવાલો અનુસાર, યુએસ ગુપ્તચર અધિકારીઓએ ટ્રમ્પ વહીવટીતંત્રને એક સંવેદનશીલ મેમો સોંપ્યો છે, જેમાં ઘટસ્ફોટ થયો છે કે એશિયન ટેક્નોલોજી કંપની 'મેગાસ્પીડ ઇન્ટરનેશનલ'ની એક્ઝિક્યુટિવ એલિસ હુઆંગ વાસ્તવમાં ચીનની સ્ટેટ સિક્યોરિટી મિનિસ્ટ્રી માટે કામ કરતી હતી. ચીનની આ જાસૂસી એજન્સીએ અમેરિકાની આર્ટિફિશિયલ ઇન્ટેલિજન્સ (AI) ક્ષમતાઓ અને અત્યાધુનિક સેમિકન્ડક્ટર ચીપ્સ વિશે મહત્ત્વની માહિતી મેળવવા માટે આ મહિલાને ખાસ નિયુક્ત કરી હોવાનું મનાય છે. ફાઇનાન્શિયલ ટાઇમ્સના અહેવાલ મુજબ, અમેરિકી અધિકારીઓ એ વાતચીત પર પણ નજર રાખી રહ્યા છે કે જેન્સન હુઆંગ અને એલિસ હુઆંગ વચ્ચે રોમેન્ટિક સંબંધો હતા, જેણે આ મામલાને વધુ સંવેદનશીલ બનાવ્યો છે.
આ પ્રકરણ સામે આવ્યા બાદ અમેરિકી રાજકારણમાં અને સુરક્ષા વર્તુળોમાં ભારે હલચલ મચી ગઈ છે. યુએસ મિડટર્મ ચૂંટણી બાદ કોંગ્રેસમાં બદલાયેલા સમીકરણો વચ્ચે રિપબ્લિકન અને ડેમોક્રેટ બંને પક્ષના નેતાઓ આ મામલે ઊંડી તપાસની માંગ કરી રહ્યા છે. આ કડીમાં, હાઉસ સિલેક્ટ કમિટી ઓન ચાઇના દ્વારા જેન્સન હુઆંગને એક સત્તાવાર પત્ર મોકલવામાં આવ્યો છે, જેમાં તેમને સંસદ સમક્ષ એક બંધ બારણે યોજાનારી સંયુક્ત બેઠકમાં ઉપસ્થિત રહીને સ્પષ્ટતા કરવા જણાવાયું છે. સમિતિ ખાસ કરીને એ વાતને લઈને ચિંતિત છે કે વિદેશી જાસૂસી સામે કંપનીના સુરક્ષા પ્રોટોકોલ કેટલા મજબૂત છે અને શું આ સંબંધોના કારણે એનવીડિયાની મહત્ત્વની ટેક્નોલોજી કે નીતિઓ પ્રભાવિત થઈ છે કે નહીં.
બીજી બાજુ, સમગ્ર વિવાદ પર પ્રતિક્રિયા આપતા એનવીડિયા કંપનીએ સ્પષ્ટ કર્યું છે કે તેના ક્લાઉડ પાર્ટનર્સ ક્યારેય યુએસ કાયદા બદલવા માટે દબાણ કરતા નથી કે ચીનમાં વેચાણ માટે ભલામણ કરતા નથી. કંપનીએ એવો પણ દાવો કર્યો છે કે કોઈપણ વ્યક્તિ તેમની પાસેથી ગુપ્ત કે સંવેદનશીલ માહિતી મેળવી શકે નહીં કારણ કે તેઓ ગ્રાહકો સાથે ક્યારેય આવી માહિતી શેર કરતા નથી. અગાઉ એક ઇન્ટરવ્યુમાં સીઈઓ જેન્સન હુઆંગે મેગાસ્પીડ સાથેના તેમના વ્યવસાયિક સંબંધોને સામાન્ય ગણાવ્યા હતા અને ખાતરી આપી હતી કે તેમની કંપની દ્વારા ચીનમાં ગેરકાયદેસર રીતે AI પ્રોસેસરો મોકલવામાં આવ્યા નથી. જોકે, ગુપ્તચર એજન્સીઓ અને સંસદીય સમિતિની કડક પૂછપરછ બાદ આ મામલો આગામી સમયમાં વધુ મોટું સ્વરૂપ ધારણ કરે તેવી પૂરેપૂરી સંભાવના છે.
