આર્ટિફિશિયલ ઇન્ટેલિજન્સ જગતમાં ચર્ચાના કેન્દ્રમાં રહેલી કંપની એન્થ્રોપિકના શરૂઆતના દિવસો કેવા હતા તે અંગે પૂર્વ કર્મચારી ઇવાન વેન્ડ્રોવે પોતાના 'નથિંગ હ્યુમન' સબસ્ટેક બ્લોગ પર 'સમ મેમોરીઝ ઓફ અર્લી એન્થ્રોપિક' શીર્ષક હેઠળ વિસ્તૃત લેખ લખ્યો છે. ઓક્ટોબર ૨૦૨૨ થી મે ૨૦૨૩ દરમિયાન જુનિયર ભૂમિકામાં કામ કરનાર વેન્ડ્રોવે કંપનીની અંદરના માહોલ પર પ્રકાશ પાડ્યો છે. તેમણે એક કિસ્સો વર્ણવતા જણાવ્યું કે, એક સાંજની સરપ્રાઈઝ પાર્ટીમાં ઓફિસમાં સુશી શેફને બોલાવવામાં આવ્યા હતા, જેના બીજા જ દિવસે એક સહ-સ્થાપકે સ્લેક પર અસંતોષ વ્યક્ત કરતા લખ્યું હતું કે આપણે અહીં અમીર બનવા કે કૅવિઅર ખાવા નથી આવ્યા, જો આપણે ફક્ત ભાત અને કઠોળ ખાઈને કામ કરીએ તો પણ ચાલે. આ પ્રકારની ઘટનાઓથી કંપનીની સંસ્કૃતિ અને ત્યાંના કામકાજની ઝાંખી થાય છે.
ગૂગલ ખાતે પાંચ વર્ષ કરતાં વધુ સમય સુધી સોફ્ટવેર એન્જિનિયર તરીકે કામ કરી ચૂકેલા વેન્ડ્રોવ એઆઈ સુરક્ષા અને તેના યોગ્ય વિકાસના હેતુથી એન્થ્રોપિકમાં જોડાયા હતા. જો કે, થોડા જ અઠવાડિયામાં તેમને એ વાત પર શંકા જવા લાગી કે કંપની જે વાસ્તવિક કામ કરી રહી છે તે તેના મૂળ મિશન સાથે સુસંગત છે કે નહીં. વેન્ડ્રોવના મતે કંપની મોટા મૉડેલ્સ અને સંશોધનો માટે ફંડ એકત્ર કરવાના હેતુથી ગ્રાહક સપોર્ટ ઓટોમેશન જેવા વ્યાપારી અને કમર્શિયલ ઉપયોગોને વધુ પ્રાથમિકતા આપી રહી હતી. એઆઈ સેફ્ટી અને અલાઈનમેન્ટને લઈને કંપનીના અભિગમ સામે પણ તેમને પ્રશ્નો થયા હતા, જેના કારણે તેમના મનમાં મૂંઝવણ વધી અને તેઓ સાથી કર્મચારીઓને પોતાની દલીલોથી મનાવવામાં સંઘર્ષ અનુભવવા લાગ્યા.
આ તમામ માનસિક તણાવ અને અસંતોષના કારણે વેન્ડ્રોવે માત્ર આઠ જ મહિનાના ટૂંકા ગાળામાં એટલે કે એપ્રિલ ૨૦૨૩માં પોતાના પદ પરથી રાજીનામું આપી દીધું હતું. સૌથી રસપ્રદ બાબત એ છે કે તેમણે કંપનીના શેર્સ કે ઇક્વિટી મળવાની રાહ પણ ન જોઈ અને તેના વિશે વિચાર્યા વગર જ નોકરી છોડી દીધી હતી. જો કે, વેન્ડ્રોવ એ વાત પણ સ્વીકારે છે કે ત્યાંના સાથી કર્મચારીઓ અત્યંત તેજસ્વી હતા અને બૌદ્ધિક ચર્ચાઓનું વાતોનું સ્તર ઊંચું હતું. સીઈઓ પણ મશીન લર્નિંગના પ્રશ્નો પર ઉત્સાહપૂર્વક ચર્ચા કરતા જોવા મળતા હતા. હાલ મિડજર્નીમાં રિસર્ચ તરીકે કામ કરી રહેલા વેન્ડ્રોવનો આ અહેવાલ એન્થ્રોપિકના શરૂઆતના સમયની એક વ્યક્તિગત ઝાંખી માત્ર છે, જે તે સમયના આંતરિક પડકારોને ઉજાગર કરે છે.
