ચેન્નાઈ સ્થિત મદ્રાસ ઇન્સ્ટિટ્યૂટ ઓફ ડેવલપમેન્ટ સ્ટડીઝના એસોસિયેટ પ્રોફેસર એ. કલૈયાહસનને એક ફેક સોશિયલ મીડિયા પોસ્ટના મામલે ખોટી રીતે અટકાયતમાં લેવામાં આવ્યા હતા. આ ઘટનાના ચાર દિવસ બાદ મુખ્યમંત્રી સી. જોસેફ વિજયે પ્રોફેસરને મળીને આ બાબતે ખેદ વ્યક્ત કર્યો હતો, પરંતુ મદ્રાસ હાઇકોર્ટે આ મામલે આકરો અભિગમ અપનાવ્યો છે. જસ્ટિસ એન. રમેશે સુનાવણી દરમિયાન સ્પષ્ટ શબ્દોમાં કહ્યું હતું કે, "માફી ગમે તેટલા ઊંચા સ્ત્રોતમાંથી આવી હોય, તે ક્યારેય જવાબદારી બની શકતી નથી." અદાલતે ઉમેર્યું હતું કે જે ઉપાય મુખ્યમંત્રીના વ્યક્તિગત હસ્તક્ષેપ પર નિર્ભર હોય, તે વાસ્તવિક અર્થમાં કોઈ ઉપાય જ નથી.
કોર્ટે સામાન્ય નાગરિકો અને પ્રતિષ્ઠિત વ્યક્તિઓ વચ્ચે પોલીસ દ્વારા કરવામાં આવતા ભેદભાવ પર પણ પ્રહાર કર્યા હતા. ન્યાયાધીશે અવલોકન કર્યું હતું કે પ્રોફેસરની પ્રતિષ્ઠાના કારણે તેઓ કલાકોમાં જ મુક્ત થઈ ગયા અને સચિવાલય સુધી પહોંચી શક્યા, પરંતુ જો કોઈ સામાન્ય નાગરિક સાથે આવી જ ભૂલભરેલી ફરિયાદના આધારે સવારે અટકાયત કરવામાં આવી હોત, તો તેને પોલીસ કોઠડી, રિમાન્ડ અને લાંબી કાનૂની લડાઈનો ભોગ બનવું પડ્યું હોત. અદાલતના મતે, કોઈ પણ પોલીસ દળની ખરી કસોટી એ નથી કે જ્યારે મીડિયા નજર રાખી રહ્યું હોય ત્યારે તે પ્રતિષ્ઠિત લોકો સાથે કેવું વર્તન કરે છે, પરંતુ એ છે કે જ્યારે કોઈ સાક્ષી ન હોય ત્યારે તે સામાન્ય નાગરિક સાથે કેવો વ્યવહાર કરે છે.
ડીએમકે કાઉન્સિલર ડી. સુધા દ્વારા મુખ્યમંત્રી સામે કથિત અપશબ્દો બોલવાના કેસમાં આગોતરા જામીન અરજી પર સુનાવણી કરતી વખતે કોર્ટે આ મહત્વપૂર્ણ અવલોકનો કર્યા હતા. કોર્ટે જણાવ્યું કે જે સરકાર પોતાની જાતમાં આત્મવિશ્વાસ ધરાવતી હોય તે ટીકાઓનો જવાબ તર્કથી, મજાકનો જવાબ પોતાના પ્રદર્શનથી અને જો ખરેખર મર્યાદા ઓળંગાય તો માનહાનિના કાયદાકીય માધ્યમોથી આપે છે. રાજકીય ભાષણ કે ટીકાઓ પ્રત્યે ઉદારતા દાખવવી એ રાજ્ય સરકારની કોઈ કૃપા નથી, પરંતુ જે લોકો સત્તામાં છે તેમની પાસેથી બંધારણ આ જ અપેક્ષા રાખે છે. કોર્ટે એ પણ ઉમેર્યું કે ચૂંટાયેલા પ્રતિનિધિઓએ સાર્વજનિક ભાષણોમાં મર્યાદા અને શાલીનતા જાળવવી અત્યંત આવશ્યક છે.
