અમેરિકામાં યોજાયેલી મહત્વપૂર્ણ ચૂંટણીઓમાં ડેમોક્રેટ્સે પ્રચંડ વિજય મેળવીને રિપબ્લિકન પાર્ટીનું વર્ચસ્વ ખતમ કરી દીધું છે. ડેમોક્રેટ્સે હાઉસ ઓફ રિપ્રેઝન્ટેટિવ્સમાં બહુમતી માટેના ૨૧૮ના આંકને પાર કરીને ૨૨૦ બેઠકો કબજે કરી લીધી છે, જ્યારે સેનેેટમાં પણ ૫૩ બેઠકો મેળવીને નિર્ણાયક બહુમતી હાંસલ કરી છે. મોંઘવારી, ઊંચા ટેરિફ અને ઈરાન સામેના યુદ્ધના કારણે વધેલા ઈંધણના ભાવોથી જનતામાં પ્રમુખ ડોનાલ્ડ ટ્રમ્પના વહીવટીતંત્ર સામે ભારે રોષ જોવા મળ્યો હતો, જેની સીધી અસર ચૂંટણી પરિણામો પર પડી છે અને રિપબ્લિકનોને મોટું નુકસાન વેઠવું પડ્યું છે.
આ ચૂંટણી પરિણામો માત્ર સત્તાનું પરિવર્તન નથી પરંતુ તે ડોનાલ્ડ ટ્રમ્પની નીતિઓ સામે જનતાનો સ્પષ્ટ અસંતોષ દર્શાવે છે. ટેક્સાસ, કેન્સાસ અને સાઉથ કેરોલિના જેવા પરંપરાગત ગઢ ગણાતા રાજ્યોમાં પણ ડેમોક્રેટિક ઉમેદવારોએ જીત મેળવીને ઇતિહાસ રચ્યો છે. આ ઉપરાંત, ઇન્ડિયાના અને જ્યોર્જિયા જેવા અગાઉ મજબૂત ગણાતા રિપબ્લિકન વિસ્તારોમાં પણ ડેમોક્રેટ્સે ભગવો મિટાવીને સત્તા પર કબજો જમાવ્યો છે. રિપબ્લિકન દિગ્ગજ નેતા સુસન કોલિન્સ જેવા અનુભવી ઉમેદવારોની હાર દર્શાવે છે કે આ ચૂંટણીમાં પક્ષની પકડ નબળી પડી છે.
સંસદના બંને ગૃહ પર ડેમોક્રેટ્સનું નિયંત્રણ આવવાથી પ્રમુખ ડોનાલ્ડ ટ્રમ્પના કાર્યકાળના બાકીના બે વર્ષ ભારે સંઘર્ષ ભરેલા બની રહેશે. હવે વિરોધ પક્ષ પાસે ટ્રમ્પના ધારાસભ્યોના એજન્ડાને અટકાવવાની અને વહીવટીતંત્ર સામે વ્યાપક તપાસ શરૂ કરવાની સત્તા આવી ગઈ છે. આ રાજકીય પલટા સામે પ્રતિક્રિયા આપતા પ્રમુખ ટ્રમ્પે સોશિયલ મીડિયા પર 'વીટો' લખેલી લાલ ટોપીનો ફોટો શેર કરીને ડેમોક્રેટ્સના નિર્ણયોને રોકવા માટે પોતાની વીટો શક્તિનો ઉપયોગ કરવાની જાહેરાત કરી છે, જેના કારણે વોશિંગ્ટનમાં આગામી સમયમાં રાજકીય ઘમાસાણ અને ગતિરોધ સર્જાય તેવી પૂરી શક્યતા છે.
