રાષ્ટ્રીય રાજધાની દિલ્હીમાં આજે રાજકીય ગરમાવો પોતાના ચરમસીમા પર પહોંચ્યો છે, જ્યાં સત્તા અને વિપક્ષ આમને-સામને આવી ગયા છે. કોંગ્રેસ સાંસદ રાહુલ ગાંધીના નેતૃત્વમાં 'ઈન્ડિયા' ગઠબંધન દ્વારા મુખ્ય ચૂંટણી કમિશનરના રાજીનામાની માંગ સાથે એક વિશાળ 'ચલો દિલ્હી' માર્ચ કાઢવામાં આવી રહી છે. મિન્ટો રોડ અને કૉનાટ પ્લેસના જંક્શનથી શરૂ થયેલી આ કૂચ રામલીલા મેદાન પર પહોંચીને એક વિશાળ રેલીમાં પરિવર્તિત થશે, જ્યાં વિપક્ષી નેતાઓ દ્વારા ચૂંટણી યાદીમાં કથિત અનિયમિતતાઓને લઈને ચૂંટણી પંચ પર ગંભીર આરોપો લગાવવામાં આવી રહ્યા છે.
આ વિપક્ષી પ્રદર્શનના જવાબમાં સત્તાધારી ભારતીય જનતા પાર્ટી (ભાજપ) પણ આક્રમક મુદ્રામાં જોવા મળી રહી છે. ભાજપે પશ્ચિમ દિલ્હીના શીખ બહુલ હરિ નગર વિસ્તારથી તિલક નગર સુધી એક વિરોધ કૂચ યોજી છે, જેનો હેતુ ૧૯૮૪ના શિખ વિરોધી રમખાણોમાં મારલા ગયેલા લોકોને શ્રદ્ધાંજલિ આપવાનો અને કોંગ્રેસ દ્વારા આ જ દિવસે માર્ચ યોજવાના ટાઈમિંગ પર સવાલ ઉઠાવવાનો છે. ભાજપનું માનવું છે કે કોંગ્રેસ જાણી જોઈને સંવેદનશીલ તારીખો પર આવા રાજકીય નાટકો કરી રહી છે જેથી જનતાનું ધ્યાન ભટકાવી શકાય.
દિલ્હી ઉપરાંત પડોશી રાજ્ય હરિયાણાના રોહતક ખાતે પણ ભાજપના રાષ્ટ્રીય અધ્યક્ષ નિતિન નબીનના નેતૃત્વમાં 'લોકતંત્ર બચાવો, અરાજકતા હટાવો' શીર્ષક હેઠળ એક પ્રભાવશાળી માર્ચ કાઢવામાં આવી રહી છે. ભાજપ આ માધ્યમથી વિપક્ષના વિરોધી અવાજને કાપવા અને દેશભરમાં એક સંતુલિત રાજકીય સંદેશ આપવા પ્રયાસ કરી રહી છે. એક જ દિવસે બે પક્ષોના આ વિરોધ પ્રદર્શનોને કારણે દિલ્હી સહિતના વિસ્તારોમાં સુરક્ષા વ્યવસ્થા સઘન કરી દેવામાં આવી છે અને રાજકીય વાતાવરણ અત્યંત તંગ બન્યું છે.
