આ પ્રતીકાત્મક સંસદીય કાર્યવાહી પાછળનો મુખ્ય ઉદ્દેશ્ય શાસક પક્ષ અને સરકારી સંસ્થાઓ પર દબાણ લાવવાનો તેમજ ચૂંટણી પ્રક્રિયામાં પારદર્શિતાના મુદ્દાઓને રાષ્ટ્રીય સ્તરે જીવંત રાખવાનો હતો. કોંગ્રેસ અધ્યક્ષના નિવાસ્થાને યોજાયેલી આ બેઠકમાં ગઠબંધનના દિગ્ગજ નેતાઓએ લોકશાહીના મૂલ્યો અને બંધારણીય સંસ્થાઓની સ્વાયત્તતાના હનનનો ગંભીર આક્ષેપ કર્યો હતો. વૌપચારિક રીતે યોજાયેલા આ સત્રમાં વિપક્ષી નેતાઓએ સરકાર વિરોધી રણનીતિને વધુ ધારદાર બનાવવાની ચર્ચા કરી હતી અને સંસદની બહાર પણ સરકારને ઘેરવા માટેની આગામી રૂપરેખા તૈયાર કરી હતી.
દરમિયાન, વિપક્ષી ગઠબંધનના આ નાટક અને મોક ઇમ્પીચમેન્ટની કાર્યવાહી સામે સત્તાધારી ભારતીય જનતા પાર્ટી (ભાજપ) દ્વારા તીખી પ્રતિક્રિયા આપવામાં આવી છે. ભાજપના વરિષ્ઠ નેતાઓ અને પ્રવક્તાઓએ ખાસ કરીને રાહુલ ગાંધી પર આકરા પ્રહારો કરતા તેને 'સંસદ અને બંધારણીય સંસ્થાઓનું અપમાન' ગણાવ્યું છે. ભાજપનું માનવું છે કે ચૂંટણી પંચ જેવી સ્વયત્ત સંસ્થાઓની વિશ્વસનીયતાને નબળી પાડવા માટે વિપક્ષ દ્વારા આ પ્રકારના ગતકડાં કરવામાં આવી રહ્યા છે, જે દેશની જનતા અને લોકશાહી પ્રણાલી પ્રત્યેની તેમની નિરાશા દર્શાવે છે.
