અમેરિકાના પ્રવાસે ગયેલા એક ભારતીય ઉદ્યોગસાહસિકે વૈભવી હોટલમાં રોકાણ દરમિયાન મળેલા પોતાના કડવા અનુભવને સોશિયલ મીડિયા પર શેર કર્યો છે, જેના પગલે ઇન્ટરનેટ પર હોસ્પિટાલિટી અને સેવાની ગુણવત્તા અંગે ગંભીર ચર્ચા શરૂ થઈ ગઈ છે. ભારતીય ઉદ્યોગપતિ વિનીત કે. અમેરિકાની એક અત્યંત મોંઘી અને પ્રખ્યાત પાંચ સિતારા હોટલમાં રોકાયા હતા, જ્યાં એક રાત્રિના રોકાણનું ભાડું આશરે છસો ડૉલર એટલે કે ભારતીય ચલણ મુજબ પચાસ હજાર રૂપિયાથી પણ વધુ હતું. આટલી મોટી રકમ ચૂકવવા છતાં સવારે નાસ્તાના મેનુમાં અત્યંત સીમિત અને સાધારણ વાનગીઓ જોઈને તેઓ સ્તબ્ધ થઈ ગયા હતા.
તેમણે પોતાના અનુભવની તુલના ભારતીય હોસ્પિટાલિટી સાથે કરતા સ્પષ્ટ શબ્દોમાં જણાવ્યું કે, ભારતીય હોટલોએ વાસ્તવમાં આપણી આદતો બગાડી નાખી છે, કારણ કે ભારતમાં આનાથી અડધા ખર્ચમાં પણ રાજાશાહી આતિથ્ય મળે છે. ભારત અને એશિયાના દેશોની વૈભવી હોટલોમાં નાસ્તાના સમયે વિશાળ બુફે પીરસવામાં આવે છે, જેમાં દક્ષિણ ભારતીય, ઉત્તર ભારતીય, દેશી-વિદેશી વાનગીઓ, તાજા ફળો, જ્યુસ અને લાઈવ કાઉન્ટરની ભરમાર હોય છે. ભારતીય લક્ઝરી હોટલોમાં તમે જે વાનગીનું નામ લો તે તમારી સમક્ષ હાજર થઈ જાય છે. તેની સરખામણીએ પશ્ચિમી દેશોમાં આટલા ઊંચા ભાવ ચૂકવ્યા છતાં માત્ર બ્રેડ, કૉફી કે સીમિત સુકા નાસ્તા જેવી બાબતો જ પીરસવામાં આવે છે.
આ પોસ્ટ સોશિયલ મીડિયા પર વાયરલ થતાં જ દેશ-વિદેશના પ્રવાસીઓ વચ્ચે ગરમાગરમ ચર્ચા છેડાઈ ગઈ છે. મોટાભાગના પ્રવાસીઓએ ભારતીય આતિથ્ય સત્કારની પ્રશંસા કરતા સ્વીકાર્યું હતું કે 'અતિથિ દેવો ભવઃ'ની ભાવના સાથે અપાતી ઉત્કૃષ્ટ સેવા અને પૈસાનું સાચું વળતર માત્ર ભારતમાં જ જોવા મળે છે. પશ્ચિમી દેશોમાં મોંઘા શ્રમ ખર્ચને કારણે આવી મર્યાદિત સુવિધાઓ મળતી હોવાની દલીલો પણ થઈ હતી, પરંતુ બહુમતી લોકોનું માનવું હતું કે ઊંચો ટેરિફ વસૂલ્યા પછી ગ્રાહકને સંતોષકારક સેવા ન આપવી તે યોગ્ય નથી. આ ચર્ચાએ વૈશ્વિક સ્તરે ભારતીય હોટેલ ઉદ્યોગની શ્રેષ્ઠતા પર ફરી એકવાર મહોર મારી દીધી છે.
