વૈશ્વિક બજારમાં સોનાના ભાવમાં મોટો ઘટાડો નોંધાયો છે અને શુક્રવારે સોનું છેલ્લા એક વર્ષના સૌથી નીચા સ્તરે બંધ રહ્યું હતું. સ્પોટ ગોલ્ડમાં ૩.૬૩ ટકાનો ઘટાડો જોવા મળ્યો હતો અને તે ઘટીને ૩,૮૭૪.૫૮ ડોલર પ્રતિ ઓસ પર પહોંચી ગયું હતું, જે ઓક્ટોબર ૨૦૨૫ પછીનું સૌથી નિમ્ન સ્તર છે. સોનાની સાથે-સાથે ચાંદીમાં પણ ભારે કડાકો બોલાયો હતો અને ચાંદી ૧૧ મહિનામાં પહેલીવાર ૫૦ ડોલરની સપાટી તોડીને ૪૯.૦૬ ડોલર પ્રતિ ઓસ પર સરકી ગઈ હતી. પ્લેટિનમ અને પેલેડિયમ જેવી કિંમતી ધાતુઓ પણ ભારે વેચવાલીના દબાણ હેઠળ ઓવરસોલ્ડ ઝોનમાં ધકેલાઈ ગઈ છે, જેના કારણે બુલિયન માર્કેટમાં ચિંતાનું વાતાવરણ છવાયું છે.
આ ભારે ઘટાડા પાછળ વૈશ્વિક સ્તરે આર્ટિફિશિયલ ઇન્ટેલિજન્સ (AI) પાછળના ખર્ચ અને તેના વળતર અંગે ઊભી થયેલી શંકાઓ જવાબદાર છે, જેના કારણે ટેક્નોલોજી શેરોમાં મોટો કડાકો થયો છે. શેરબજારમાં આવેલા આ નરમાઈના મોજાને કારણે રોકાણકારો દ્વારા સોના જેવી સુરક્ષિત મનાતી અસેટ્સનું પણ ફોર્સ્ડ સેલિંગ કરવામાં આવ્યું હતું. વળી, યુએસ ફેડરલ રિઝર્વ દ્વારા વ્યાજદરોના સ્તરને ઊંચા રાખવાના સંકેતો અને સતત વધતા ફુગાવાને કારણે કિંમતી ધાતુઓ પર દબાણ વધ્યું છે. જાન્યુઆરીમાં ૫,૫૯૫ ડોલરની રેકોર્ડ સપાટીને સ્પર્શ્યા બાદ સોનું અત્યાર સુધીમાં આશરે ૩૦ ટકા સુધી ઘટી ચૂક્યું છે અને એશિયામાં પણ તેની માગ નબળી રહી છે.
આગામી નવેમ્બર અને ડિસેમ્બર મહિનામાં સોના-ચાંદીના બજારની દિશા નક્કી કરવામાં અમેરિકાના આર્થિક આંકડાઓ અને રાજકીય ઘટનાક્રમ મહત્વપૂર્ણ ભૂમિકા ભજવશે. આગામી શુક્રવારે જાહેર થનારા રોજગારીના આંકડાઓ અમેરિકી અર્થતંત્રની સ્થિતિ સ્પષ્ટ કરશે, જ્યારે યુએસ ચૂંટણીઓ પણ બજારને પ્રભાવિત કરી શકે છે. કોમેઝબેંકના વિશ્લેષકોના મતે, આ કામચલાઉ ઘટાડા બાદ કિંમતી ધાતુઓમાં ફરી રિકવરી જોવા મળી શકે છે કારણ કે જ્યારે પણ સોનું ૪,૦૦૦ ડોલરથી નીચે આવે છે ત્યારે સેન્ટ્રલ બેંકો દ્વારા ખરીદી વધવાની પૂરેપૂરી સંભાવના રહે છે.
