મંગળવારે ન્યૂયોર્ક સિટીમાં સોથેબીઝ દ્વારા યોજાયેલી ઓક્શનમાં ડાયનાસોરની એક અત્યંત દુર્લભ અને કિંમતી પ્રજાતિનું હાડપિંજર રેકોર્ડબ્રેક ભાવે વેચાયું છે. આ હાડપિંજર નેનોટિરાનસનું છે, જેને હવે ટિરાનોસોરસ રેક્સ (T. rex) નો નાનો પિતરાઈ ભાઈ માનવામાં આવે છે. ઓક્શન હાઉસ દ્વારા આ ફોસિલના 6 થી 9 મિલિયન ડોલર મળવાની અપેક્ષા રાખવામાં આવી હતી, પરંતુ અકલ્પનીય રીતે આ હાડપિંજર 47.3 મિલિયન ડોલરમાં વેચાયું છે. મિની T. rex જેવા દેખાતા આ ડાયનાસોરના હાડપિંજરે દુનિયાની સૌથી મોંઘી ફોસિલની યાદીમાં સ્થાન મેળવી લીધું છે. 'જોડી' ઉપનામ ધરાવતા આ હાડપિંજરે અત્યાર સુધી વેચાયેલા ડાયનાસોરના હાડપિંજરોમાં બીજું સૌથી મોંઘું વેચાણ બનવાનો રેકોર્ડ બનાવ્યો છે. આ અગાઉ આ વર્ષના ઉનાળામાં 'ગસ' નામનું T. rex ફોસિલ 50.1 મિલિયન ડોલરમાં વેચાયું હતું.
આ રોમાંચક ઓક્શન લગભગ 12 મિનિટ સુધી ચાલ્યું હતું, જેમાં ઓનલાઈન અને ફોન દ્વારા બોલી લગાવનાર અન્ય 5 ખરીદદારોને પાછળ છોડીને એક અજ્ઞાત ખરીદદારે આ હાડપિંજર ખરીદી લીધું છે. નેનોટિરાનસ એ પુખ્ત T. rex ની લંબાઈથી લગભગ અડધું હતું અને આ બંને જીવો ક્રિટેસિયસ પીરિયડ દરમિયાન આજથી આશરે 67 મિલિયન વર્ષો પહેલાં સાથે અસ્તિત્વ ધરાવતા હતા. 6.5 ફૂટ એટલે કે 2 મીટર ઊંચાઈ અને લગભગ 20 ફૂટ એટલે કે 6 મીટર લંબાઈ ધરાવતું આ 'જોડી' નામનું હાડપિંજર દુનિયામાં માત્ર 3 જ જાણીતા હાડપિંજરોમાંથી એક છે, જે લગભગ 70 ટકા જેટલું સંપૂર્ણ છે. આ ડાયનાસોરનું નામ મોન્ટાનાના રેન્ચર જોડી પિયર્સનના નામ પરથી રાખવામાં આવ્યું છે, જેમણે 2019માં પોતાની જમીન પરથી આ અદ્ભુત શોધ કરી હતી.
દાયકાઓ સુધી વૈજ્ઞાનિકોમાં એ વાતને લઈને મતભેદ હતો કે નેનોટિરાનસ એ ડાયનાસોરનો અલગ પ્રકાર છે કે પછી T. rex નું બચ્ચું છે, પરંતુ ગયા વર્ષે પ્રકાશીત થયેલા સંશોધનમાં સાબિત થયું કે તે અલગ જીનસ છે. આ મહત્વપૂર્ણ ફોસિલના વેચાણ બાદ હવે વૈજ્ઞાનિકોમાં ચર્ચા શરૂ થઈ છે કે આવા ઐતિહાસિક અશ્મિઓ ખાનગી હાથોમાં જવાને બદલે મ્યુઝિયમમાં હોવા જોઈએ જેથી સંશોધકો અને જનતા તેનો અભ્યાસ કરી શકે. સોથેબીઝે આ શોધ કરનાર પ્રોફેશનલ ફોસિલ હન્ટર્સની ટીમને બિરદાવી છે, જેમના સંઘર્ષની કહાની ડિસ્કવરી ચેનલની ડોક્યુમેન્ટરી સિરીઝમાં પણ દર્શાવવામાં આવી હતી. આ અદ્ભુત વેચાણે સાબિત કરી દીધું છે કે વૈજ્ઞાનિક ક્ષેત્રે સામાન્ય લોકો પણ મોટું યોગદાન આપી શકે છે.
