આજકાલ મેન્યુફેક્ચરિંગ સેક્ટરમાં એઆઈ એટલે કે આર્ટિફિશિયલ ઇન્ટેલિજન્સનો દબદબો વધી રહ્યો છે, જેમાં પ્રિડિક્ટીવ મેન્ટેનન્સથી લઈને સ્માર્ટ સપ્લાય ચેઈન મેનેજમેન્ટ સુધીના કામો માટે ટેક્નોલોજીનો વ્યાપક ઉપયોગ થઈ રહ્યો છે. આ બદલાતા સમય સાથે તાલ મલાવવા માટે હોનીવેલ ટેક્નોલોજીસ, આરપીજી ગ્રુપ અને આઈટીસી જેવી દિગ્ગજ કંપનીઓ એવા લીડર્સની શોધમાં છે જે એલ્ગોરિધમને પ્રોડક્શન, ક્વોલિટી અને કોસ્ટ સાથે જોડી શકે. કંપનીઓ એવા લોકોને પ્રાથમિકતા આપી રહી છે જેઓ મશીન લર્નિંગ, જનરેટિવ એઆઈ, ડેટા આર્કિટેક્ચર અને ઓટોમેશનની સાથે મેન્યુફેક્ચરિંગ પ્રોસેસ અને પ્લાન્ટ ઓપરેશન્સની પણ ઊંડી સમજ ધરાવતા હોય.
ઓટોમોટિવ, ઓટો કમ્પોનેન્ટ્સ, ટેક્સટાઇલ્સ, કેમિકલ્સ, ફાર્માસ્યુટિકલ્સ અને ટાયર સેક્ટરમાં એઆઈ અને ડિજિટલ લીડરશિપની માંગ ઝડપથી વધી રહી છે. ભારતીય કંપનીઓ વિદેશી એક્સપેટ્સ કરતા વિદેશમાં રહેતા ભારતીય મૂળના એક્ઝિક્યુટવ્સમાં વધુ રસ દાખવી રહી છે, જેમાં યુએસ, યુકે અને યુરોપ મુખ્ય હબ સાબિત થઈ રહ્યા છે. આરપીજી ગ્રુપ છેલ્લા 2 વર્ષમાં પોતાના ડિજિટલ ટેલેન્ટ બેઝમાં 20% નો વધારો જોઈ ચૂક્યું છે, અને CEAT, કેઇસી તથા ઝેન્સાર જેવી કંપનીઓમાં એઆઈનું ઇન્ટિગ્રેશન કરી રહ્યું છે. બીજી તરફ હોનીવેલ ટેક્નોલોજીસ પાયથોન, સ્પાર્ક, ડેટા સાયન્સ અને જનરેટિવ એઆઈ જેવી સ્કિલ્સ ધરાવતા એક્સપર્ટ્સની ભરતી કરી રહી છે જેથી ઓટોમેશનથી ઓટોનોમી તરફ જઈ શકાય.
ટેક્નિકલ કુશળતા અને બિઝનેસની સૂઝબૂઝ ધરાવતા આ ખાસ લીડર્સ માટે કંપનીઓ વચ્ચે ભારે હરીફાઈ જોવા મળી રહી છે. મોટી કોર્પોરેટ કંપનીઓમાં આ ભૂમિકા માટેનું વાર્ષિક કમ્પેન્સેશન રિટેન્શન કે લોંગ-ટર્મ ઇન્સેન્ટિવ્સ પહેલા જ સીધું 7 થી 8 કરોડ સુધી પહોંચી જાય છે. એમ્પ્લોયર્સ હવે ચીફ ઇન્ફોર્મેશન ઓફિસર અથવા ચીફ ડિજિટલ ઓફિસરને જવાબદારી સોંપવાને બદલે સમર્પિત ગ્રુપ-લેવલ એઆઈ ચીફ્સની નિયુક્તિ કરવા પર ભાર મૂકી રહ્યા છે, જે ભવિષ્યમાં મેન્યુફેક્ચરિંગ સેક્ટરનું ચિત્ર બદલી નાખશે.
