સોમવારે રાત્રે આશરે 9.45 વાગ્યે તમિલનાડુની થેની સબ-જેલમાં અનોખી ફિલ્મીઢબે સૌથી મોટો જેલબ્રેક સામે આવ્યો છે. 200 કેદીઓની ક્ષમતાવાળી આ જેલમાં 334 કેદીઓ બંધ હતા, જેનો લાભ લઈને અંદર રહેલા 17 કેદીઓએ ભાગી છૂટવાનો પ્લાન બનાવ્યો હતો. આ પ્લાન મુજબ બ્લોક નંબરમાં રહેલા મુથુ ઇલંગોવને અચાનક એપિલેપ્ટીક સિઝર એટલે કે વાઈની બિમારીનું નાટક શરૂ કર્યું અને તેને શ્વાસ લેવામાં તકલીફ પડતી હોય તેવું દેખાડ્યું. તેના સાથી કેદીઓએ બૂમાબૂમ કરતા ડ્યૂટી પર રહેલા કોન્સ્ટેબલ સ્ટેલિન પ્રભુએ અગાઉ તેને 3 વખત હોસ્પિટલ ખસેડાયો હોવાથી દયા ખાઈને સેલનું તાળું ખોલ્યું હતું, અને ત્યાં જ અસલી ખેલ શરૂ થયો હતો.
સેલનું તાળું ખુલતા જ કેદીઓએ સ્ટેલિન પર બ્લેન્કેટ ફેંકીને હુમલો કરી દીધો હતો. અવાજ સાંભળીને દોડી આવેલા અન્ય ગાર્ડ મધનને પણ કેદીઓએ પકડી લીધો અને તેની દોઢ સોવરિનની સોનાની ચેઇન પણ લૂંટી લીધી. ગાર્ડ્સ દ્વારા વિરોધ કરવા છતાં કેદીઓએ તેમને એક રૂમમાં પૂરી દીધા અને કિચનમાંથી મોટા વાસણો તથા યુટેન્સિલ્સ હથિયાર તરીકે હાથમાં લઈ લીધા. મુખ્ય દરવાજા પર રોકવા ગયેલા ગાર્ડ થંગાપાંડી પર વાસણોથી જીવલેણ હુમલો કરીને તેને લોહીલુહાણ કરી દીધા બાદ કેદીઓએ ચાવીઓ કબજે કરી લીધી. જેલની બહાર શિફ્ટ બદલવા માટે રાહ જોઈ રહેલા 5 ગાર્ડ્સે તેમને રોકવાનો પ્રયાસ કર્યો તો તેમના પર પથ્થરમારો કરીને કેદીઓ ભાગી છૂટ્યા. આશ્ચર્યની વાત એ છે કે જેલની 3 લેયરની સુરક્ષા પાર કરવા છતાં સેન્ટ્રલાઇઝ્ડ સાયરન સિસ્ટમ ફેલ ગઈ હતી અને કોઈ એલાર્મ વાગ્યો નહોતો.
આ ઘટના બાદ પોલીસ વિભાગમાં હડકંપ મચી ગયો છે અને બેદરકારી બદલ 2 હેડ કોન્સ્ટેબલ અને 6 ગ્રેડ-II ગાર્ડ સહિત 9 કર્મચારીઓને સસ્પેન્ડ કરી દેવામાં આવ્યા છે. વળી, અંદરના કોઈ કર્મચારીની મિલીભગત છે કે નહીં તેની પણ તપાસ ચાલી રહી છે. ભાગી ગયેલા તમામ 17 કેદીઓ અંડરટ્રાયલ કેદી હતા અને તેમની સામે મર્ડર, મર્ડર અટેમ્પટ અને ડ્રગ્સ જેવા ગંભીર કેસો નોંધાયેલા છે. તેમાંથી 5 કેદીઓ તો 28 જૂનના રોજ મદુરાઈમાં થયેલા R સિદ્દીક નામના યુવાનની હત્યાના કેસમાં પકડાયેલા હતા. હાલ પોલીસની ટીમો ફરાર આરોપીઓના ઘરો પર નજર રાખી રહી છે અને તેમને ઝડપી પાડવા માટે ચક્રો ગતિમાન કર્યા છે.
