પેટ્રોલના વધતા ભાવ અને વિદેશી ક્રુડ ઓઈલ પરની આપણી નિર્ભરતા ઘટાડવા માટે સરકાર હવે ઈથેનોલ પર સૌથી મોટો દાવ લગાવી રહી છે. બજારમાં હજુ E20 પેટ્રોલની ચર્ચાઓ પૂરી થઈ નથી ત્યાં સરકારે તેનાથી આગળ વધીને E85 અને E100 ફ્યુલથી ચાલતી ગાડીઓ માટેનો રસ્તો સાફ કરી દીધો છે. એટલે કે આવનારા દિવસોમાં આપણી ગાડીઓ પેટ્રોલના બદલે શુદ્ધ ઈથેનોલના ભરોસે રસ્તા પર દોડતી જોવા મળશે. સડક પરિવહન અને રાજમાર્ગ મંત્રાલયે 23 ઓક્ટોબર 2026 ના રોજ સેન્ટ્રલ મોટર વ્હીકલ રૂલ્સ, 1989 માં મહત્વનું સંશોધન કરીને E85 અને E100 ફ્યૂલના નિયમોને સત્તાવાર રીતે સામેલ કરી દીધા છે.
પરંતુ અહીં એક મોટો પેંચ એ છે કે તમે તમારી હાલની સામાન્ય પેટ્રોલ કારમાં જઈને સીધું E100 ફ્યૂલ ભરાવી શકશો નહીં. E100 અથવા E85 ફ્યૂલનો ઉપયોગ માત્ર એવા જ વાહનોમાં થઈ શકશે જેને ખાસ આ જ ટેકનોલોજી માટે ડિઝાઈન કરીને પ્રમાણિત કરવામાં આવ્યા હોય. જો તફાવત સમજીએ તો, E85 માં 85 ટકા ઈથેનોલ અને 20 ટકા પેટ્રોલ હોય છે, જ્યારે E100 સંપૂર્ણપણે શુદ્ધ ઈથેનોલ ફ્યૂલ છે. સામાન્ય કાર કે E20 ગાડીઓના એન્જિન આટલા હાઈ ઈથેનોલ બ્લેન્ડને સહન કરી શકે તેવા નથી હોતા, તેથી ગાડીની ફ્યૂલ સિસ્ટમ અને એન્જિનને આ ફ્યૂલ પ્રમાણે જ ખાસ તૈયાર કરવા પડે છે. સરકારના આ નવા નિયમોથી ઓટોમોબાઈલ કંપનીઓ માટે ભારતીય બજારમાં ફ્લેક્સ-ફ્યૂલ ગાડીઓ લોન્ચ કરવાનો કાયદાકીય માર્ગ એકદમ આસાન બની ગયો છે.
આ દિશામાં પહેલું મોટું ડગલું ભરતા દેશની દિગ્ગજ ઓટો કંપની મારૂતિ સુઝુકીએ પોતાની પહેલી ફ્લેક્સ ફ્યૂલ કાર રૂપે Maruti Wagon R Flex Fuel બજારમાં મૂકી છે, જેને કેન્દ્રીય મંત્રી નીતિન ગડકરી દ્વારા ખુલ્લી મૂકવામાં આવી હતી. આ કાર E85 ફ્યૂલ પર સડક પર સડસડાટ દોડી શકે છે. સૌથી મોટી રાહતની વાત એ છે કે આ ખાસ ફ્યૂલ રેગુલર પેટ્રોલની કિંમત રૂ. 102.12 પ્રતિ લિટરની સરખામણીએ લગભગ રૂ. 20 સસ્તું એટલે કે દિલ્હીમાં માત્ર રૂ. 82.12 પ્રતિ લિટરના ભાવે ઉપલબ્ધ છે. વાત કરીએ તેના માઈલેજની તો, ટેસ્ટ ડ્રાઈવ દરમિયાન આ કારે મલ્ટી ઈન્ફોર્મેશન ડિસ્પ્લે પર આશરે 11.8 કિલોમીટર પ્રતિ લિટરની એવરેજ આપી હતી. જો કે, દિલ્હીનો હેવી ટ્રાફિક અને ટેસ્ટિંગના સમયની પરિસ્થિતિઓને જોતા વાસ્તવિક રોડ પર આ માઈલેજમાં થોડો ફેરફાર જોવા મળી શકે છે. ટૂંકમાં, આગામી સમયમાં સસ્તું ઈંધણ અને પર્યાવરણને અનુકૂળ ડ્રાઈવિંગનો નવો યુગ શરૂ થવા જઈ રહ્યો છે.
