સુરત શહેરના કાપડ બજારમાં વેપારીઓ સાથે છેતરપિંડી આચરતી એક ચાલાક ગેંગનો પર્દાફાશ થયો છે. સુરતના સારોલી વિસ્તારમાં ટેક્સટાઇલ બિઝનેસ સાથે સંકળાયેલા એક વેપારી સાથે રૂપિયા 1,24,56,608ની મસમોટી ઠગાઈ આચરનાર આરોપી ફૈજુ મજીદ આમદાનીને પોલીસ દ્વારા દબોચી લેવામાં આવ્યો છે. વેપારીઓ સાથે થતી આવી ઘટનાઓથી આખા માર્કેટમાં ચકચાર મચી ગઈ છે અને વેપારીઓમાં પણ કહી ખુશી કહી ગમ જેવું વાતાવરણ જોવા મળી રહ્યું છે, કારણ કે માસ્ટરમાઇન્ડ હવે પોલીસની પકડમાં આવી ગયો છે.
આ આરોપીની કામ કરવાની રીત એટલે કે મોડસ ઓપરેન્ડી બહુ જ શાતિર હતી. તે શરૂઆતમાં કોઈપણ વેપારી પાસેથી નાના ઓર્ડર આપીને માલ ખરીદતો અને સમયસર પેમેન્ટ પણ ચૂકવી દેતો હતો. આના કારણે વેપારીઓનો તેના પર પાક્કો વિશ્વાસ બેસી જતો કે આ માણસ બહુ સાચો છે અને નાણાં સમયસર આપી દે છે. એકવાર ભરોસો જીતી લીધા પછી આ ચાલાકે મોટો દાવ રમ્યો અને વેપારી પાસેથી વિશ્વાસના જોરે એકસાથે કરોડો રૂપિયાનું ગ્રે કાપડ ઉધારમાં ખરીદી લીધું. પરંતુ, માલ હાથમાં આવ્યા બાદ તેણે રૂપિયા ચૂકવવાનું ટાળ્યું અને લાંબો સમય વીતી જવા છતાં હાથ અદ્ધર કરી દીધા.
આટલી મોટી રકમની છેતરપિંડી થતાં જ પીડિત વેપારીના પગ નીચેથી જમીન સરકી ગઈ હતી અને મામલો તરત જ સારોલી પોલીસ સ્ટેશન સુધી પહોંચ્યો હતો. પોલીસે ગુનાની ગંભીરતાને પારખીને ટેક્નિકલ સર્વેલન્સ અને બાતમીદારોની મદદથી વોટર સાઇડ ઓપરેશન પાર પાડ્યું હતું અને આખરે આરોપી ફૈજુ મજીદ આમદાનીને ઝડપી પાડવામાં સફળતા મેળવી હતી. હાલ પોલીસ સ્ટેશનમાં આરોપીની કડક પૂછપરછ ચાલી રહી છે કે આ ઠગાઈના નેટવર્કમાં તેની સાથે બીજા કોણ-કોણ સામેલ છે અને વેપારીઓ પાસેથી ખરીદેલું કરોડો રૂપિયાનું ગ્રે કાપડ તેણે કઈ જગ્યાએ જઈને સગેવગે કર્યું છે.
