દિવાળી અને તહેવારોની સિઝનમાં જો તમે પણ પરિવાર કે મિત્રો સાથે અયોધ્યામાં રામલલાના દર્શન કરવા જવાનો પ્લાન બનાવી રહ્યા છો, તો આ મહત્વપૂર્ણ સમાચાર તમારા માટે જ છે. ઉત્તર પ્રદેશના અયોધ્યા સ્થિત ભવ્ય રામ મંદિરમાં હવે 1 નવેમ્બરથી ભગવાનના દર્શન, આરતી અને ભોગના સમયમાં મોટો ફેરફાર થવા જઈ રહ્યો છે. હવામાનમાં આવી રહેલા પલટા અને ઠંડીની શરૂઆતને ધ્યાનમાં રાખીને મંદિર પ્રશાસન દ્વારા આ નવું શેડ્યુલ બહાર પાડવામાં આવ્યું છે, જેની સીધી અસર સવારની આરતીથી લઈને રાત્રે મંદિર બંધ થવાના સમય સુધી રહેશે.
નવા ટાઈમિંગ મુજબ હવે સવારે 3:45 ના બદલે 4 કલાકે મંદિરના કપાટ ખૂલશે. આ પછી સવારે 4:30 કલાકે મંગળા આરતી સંપન્ન થશે અને સવારે 6:30 કલાકે શ્રૃંગાર આરતી યોજાશે. જ્યારે સામાન્ય શ્રદ્ધાળુઓ માટે સવારે 7 કલાકે દર્શન શરૂ થઈ જશે. આખો દિવસ ચાલતી આ દર્શન વ્યવસ્થામાં ભગવાનના ભોગ અને આરામનો સમય પણ સામેલ છે. મંદિર પ્રશાસનની માહિતી અનુસાર સવારે 8 થી 8:10 કલાક સુધી બાલભોગ માટે દર્શન થોડીવાર માટે બંધ રહેશે. ત્યારબાદ સવારે 11:30 કલાકથી બપોરના 12 કલાક સુધી રાજભોગ ધરાવાશે અને બપોરે 12:30 થી 1:30 કલાક સુધી રામલલાના આરામનો સમય નિશ્ચિત કરવામાં આવ્યો છે.
બપોરે 1:35 કલાકથી ભક્તો માટે ફરીથી દર્શન શરૂ થઈ જશે, જે સાંજે 7 કલાકે યોજાનારી સંધ્યા આરતી સુધી ચાલુ રહેશે. આજના સમયમાં રાત્રે 10:30 કલાકે મંદિર બંધ થતું હતું, પરંતુ હવે નવા નિયમ મુજબ સાંજે 9:30 કલાકે શયન આરતી થશે અને રાત્રે 10 કલાકે જ મંદિરના કપાટ બંધ કરી દેવામાં આવશે. જો તમે અમદાવાદ કે ગુજરાતના અન્ય શહેરોમાંથી અયોધ્યા જવા માટે ફ્લાઇટ, ટ્રેન કે બસનું બુકિંગ કરાવ્યું હોય, તો આ નવા સમયને ધ્યાનમાં રાખીને જ તમારો આખો પ્લાન ગોઠવજો જેથી મંદિરમાં પહોંચ્યા પછી કોઈ અગવડ ન પડે. સરયુ નદીના કિનારે વસેલી આ પવિત્ર નગરીમાં 5 ઓગસ્ટ 20ജ20 ના રોજ વડાપ્રધાન નરેન્દ્ર મોદીના હસ્તે ભૂમિપૂજન થયા બાદ રામ મંદિરનું નિર્માણ થયું છે, અને અહીં આવતા લાખો શ્રદ્ધાળુઓની સુવિધા માટે પ્રશાસન સતત ધ્યાન રાખી રહ્યું છે.
