સુરત જિલ્લાના ઓલપાડ તાલુકાના કાંઠા વિસ્તારમાં આવેલા કપાસી ગામેથી એક હચમચાવનારી ઘટના સામે આવી છે. ગામની સીમમાં આવેલા તુષાર હરીલાલ પટેલના ઝીંગા તળાવ પર મજૂરી કામ કરતા પરપ્રાંતીય શ્રમિકો વચ્ચે સામાન્ય બાબતે થયેલી બબાલ લોહિયાળ જંગમાં ફેરવાઈ ગઈ હતી. ઝારખંડના આનંદપુર જિલ્લાના આજુબાજુના ગામોમાંથી કુલ 7 મજૂરો અહીંના પડાવમાં રહીને ગુજરાન ચલાવતા હતા. ગત 7 ઓક્ટોબરના રોજ આ જ પડાવમાં રહેતા 25 વર્ષીય મુન્ના કોટોવાર નામના યુવકને અહીં રહેતા બસલેન કછુઆ નામના આધેડ મજૂર સાથે કોઈ બાબતે બોલાચાલી થઈ હતી. આ મામલો એટલો વધી ગયો કે ગુસ્સામાં આવેલા મુન્નાએ લાકડીના ડંડા વડે બસલેન ઉપર આડેધડ હુમલો કરી દીધો હતો, જેના કારણે આધેડ બેભાન થઈને જમીન પર ફસડાઈ પડ્યા હતા.
આ ઘટના બાદ તાત્કાલિક ઓલપાડ પોલીસ મથકમાં આરોપી વિરુદ્ધ સામાન્ય મારામારીની કલમો હેઠળ ગુનો નોંધવામાં આવ્યો હતો. હુમલામાં માથાના ભાગે ગંભીર અને જીવલેણ ઈજાઓ થવાને કારણે બસલેનને સુરતની નવી સિવિલ હોસ્પિટલમાં સારવાર અર્થે ખસેડવામાં આવ્યા હતા. જો કે, તબિયતમાં કોઈ સુધારો ન થતાં અને પરિસ્થિતિ વધુ વણસતી જોઈને પરિવારજનોએ તેમને સારવાર માટે વતન ઝારખંડ લઈ જવાનો નિર્ણય કર્યો હતો. ગત 18 ઓક્ટોબરના રોજ પરિવાર તેમને એમ્બ્યુલન્સ કે વાહનમાં વતન લઈ જઈ રહ્યો હતો, ત્યારે જ રસ્તામાં જ બસલેન કછુઆનું દુઃખદ અવસાન થયું હતું. વતન પહોંચ્યા બાદ પરિવાર દ્વારા મૃતદેહનું પોસ્ટમોર્ટમ કરાવવામાં આવ્યું હતું અને મૃતક મજૂરના પુત્ર રોહન કછુઆએ ઝારખંડના આનંદપુર પોલીસ મથકમાં આરોપી મુન્ના વિરુદ્ધ ખૂનની ફરિયાદ નોંધાવી હતી.
ઝારખંડ પોલીસમાં નોંધાયેલી આ ફરિયાદ ઓલપાડ પોલીસ મથકમાં ટ્રાન્સફર થતાં જ કેસનું ચિત્ર જ બદલાઈ ગયું હતું. પોલીસે 18 દિવસ પહેલા નોંધાયેલા મારામારીના ગુનામાં હવે ખૂનની ગંભીર કલમોનો ઉમેરો કરીને આરોપીને પકડી પાડવા માટેના ચક્રો ગતિમાન કર્યા હતા. તપાસ દરમિયાન જાણવા મળ્યું હતું કે આરોપી મુન્ના ઘટના બાદ વતન ઝારખંડ ભાગી ગયો છે. આ માહિતીના આધારે ઓલપાડ પોલીસની ટીમ તાત્કાલિક ઝારખંડ પહોંચી ગઈ હતી અને ગત 24 ઓક્ટોબરના રોજ આરોપી મુન્ના કોટોવારને દબોચીને સુરત પાછી લઈ આવી હતી. આ મામલે પોલીસને આશંકા છે કે આ હુમલામાં એકલો મુન્ના જ નહીં પરંતુ અન્ય કોઈની પણ સંડોવણી હોઈ શકે છે, જેને લઈને પોલીસે આરોપીના 5 દિવસના પોલીસ કસ્ટડી રિમાન્ડ મેળવીને કોર્ટમાં રજૂ કરવાની તજવીજ હાથ ધરી છે અને આ સમગ્ર કેસની વધુ તપાસ પીઆઈ સી.આર.જાદવ ચલાવી રહ્યા છે.
