નાગપુર શહેરમાં એક ચોંકાવનારી ઘટના પ્રકાશમાં આવી છે જ્યાં એક ભાડૂતાએ મકાનનું ભાડું ન ચૂકવી શકવાને કારણે ભાડાના રૂમમાં જ પાંચસો રૂપિયાની બત્રીસ લાખ રૂપિયાની બનાવટી ચલણી નોટો છાપી દીધી હોવાનું સામે આવ્યું છે. આ સમગ્ર કૌભાંડનો ભાંડો ત્યારે ફૂટ્યો જ્યારે ભાડૂતો ઘણા દિવસો સુધી દેખાયો નહીં અને મકાનમાલિકે શંકાના આધારે રૂમનું તાળું તોડી નાખ્યું. રૂમની અંદરનો નજારો જોઈને મકાનમાલિકના હોશ ઉડી ગયા અને તેણે તુરંત જ સ્થાનિક પોલીસ મથકનો સંપર્ક સાધીને સમગ્ર માની જાણ કરી હતી.
પોલીસ તપાસમાં બહાર આવ્યું છે કે આરોપી પુષ્પક કૃષ્ણ ભંડારકર નામના આ શખ્સે દોઢ વર્ષ પહેલાં ખરબી વિસ્તારમાં આ રૂમ ભાડે રાખ્યો હતો. તેનો કરાર જાન્યુઆરીમાં જ પૂરો થઈ ગયો હતો અને તેણે છેલ્લા કેટલાક મહિનાઓથી ભાડું આપવાનું પણ બંધ કરી દીધું હતું. જ્યારે મકાનમાલિકે તેને મકાન ખાલી કરવા માટે કહ્યું ત્યારે આરોપીએ તેને છરી બતાવીને જાનથી મારી નાખવાની ધમકી પણ આપી હતી. આ બાબતે અગાઉ પોલીસ મથકે ફરિયાદ પણ નોંધાઈ હતી. આરોપી લાંબા સમય સુધી રૂમ પર ન આવતા મકાનમાલિકે શનિવારે હથોડી વડે રૂમનું તાળું તોડી નાખ્યું હતું અને અંદર જઈને જોયું તો ચોંકી ગયો હતો.
રૂમની અંદર પ્લાસ્ટિકની ડોલ અને ટેબલ પર પાંચસો રૂપિયાની બનાવટી નોટોના બંડલો, છાપકામ માટેનું પ્રિન્ટર અને અન્ય સામગ્રી વેરવિખેર પડેલી હતી. પોલીસે ત્વરિત કાર્યવાહી કરીને ઘટનાસ્થળે પહોંચીને અડતાલીસ લાખ રૂપિયાથી વધુની કિંમતનું પ્રિન્ટિંગ મટીરિયલ અને બનાવટી નોટો જપ્ત કરી હતી. નોટો ગણવા માટે ખાસ મશીન મંગાવવામાં આવ્યું હતું અને પ્રાથમિક તપાસમાં અંદાજે સાડત્રીસ લાખ રૂપિયાની બનાવટી ચલણી નોટો છાપવામાં આવી હોવાનું સ્પષ્ટ થયું છે. હાલ મુખ્ય આરોપી પોલીસ પકડથી દૂર છે અને તેને ઝડપી પાડવા માટે પોલીસ દ્વારા સઘન શોધખોળ હાથ ધરવામાં આવી રહી છે.
