મુંબઈના રાજકીય વર્તુળોમાં ચાલી રહેલી ચર્ચાઓ વચ્ચે કોંગ્રેસના વરિષ્ઠ અને અનુભવી નેતા સુશીલકુમાર શિંદેએ એક ચોંકાવનારો ઘટસ્ફોટ કર્યો છે. તેમણે જાહેરમાં સ્વીકાર્યું છે કે તેમને ભારતીય જનતા પાર્ટીમાં જોડાવા માટે અગાઉ અનેક વખત આમંત્રણો મળ્યા હતા, પરંતુ તેમણે પોતાની વિચારધારા અને સિદ્ધાંતોને વળગી રહીને આ તમામ પ્રસ્તાવો નકારી કાઢ્યા હતા. મહારાષ્ટ્રના પૂર્વ મુખ્યમંત્રી રહી ચૂકેલા સુશીલકુમાર શિંદેએ સ્પષ્ટપણે જણાવ્યું કે વ્યક્તિ માટે પક્ષ કરતા તેની પાયાની વિચારધારા વધુ મહત્વની હોય છે.
આ નિવેદન આપતી વખતે તેમણે તેમના પૌત્ર દ્વારા વડાપ્રધાનના જન્મદિન નિમિત્તે લગાવવામાં આવેલા અભિનંદન બેનરો અને તાજેતરમાં વડાપ્રધાન સાથે થયેલી મુલાકાત વિશે સ્પષ્ટતા કરી હતી. તેમણે કહ્યું કે શિષ્ટાચારના ભાગરૂપે શુભેચ્છાઓ પાઠવવામાં કે કોઈ નેતાને મળવામાં કોઈ ખોટું નથી, પરંતુ તેનો અર્થ એ નથી કે પક્ષ બદલી નાખવો. શિંદેએ ઉમેર્યું કે તેમણે એવા નેતાઓની સ્થિતિ પણ નજીકથી જોઈ છે જેઓ તાજેતરના સમયમાં અન્ય પક્ષો છોડીને ભાજપમાં જોડાયા છે. તેમણે સ્પષ્ટ શબ્દોમાં પ્રશ્ન કર્યો હતો કે ત્યાં જઈને તેમને આખરે શું મળવાનું હતું? તેથી તેમણે કોંગ્રેસ પક્ષમાં રહીને જ સેવા કરવાનું યોગ્ય માન્યું.
આ મામલે પ્રતિક્રિયા આપતા કોંગ્રેસના અન્ય સહયોગી અને મહારાષ્ટ્રના પૂર્વ મુખ્યમંત્રી પૃથ્વીરાજ ચવાણે પણ સમર્થન આપ્યું છે. તેમણે જણાવ્યું કે રાજકીય ક્ષેત્રે આવા પ્રસ્તાવો ઘણીવાર સામાન્ય વાતચીતમાં કે અવસરે મળતા હોય છે, અને ક્યારેક ઉચ્ચ સ્તરેથી પણ સંદેશાઓ આવતા હોય છે. કોઈપણ રાજકીય સંગઠનને પોતાના પક્ષનો વ્યાપ વધારવાનો અધિકાર છે, પરંતુ સુશીલકુમાર શિંદેએ આ પ્રસ્તાવ સ્વીકાર્યો ન હતો તે એટલું જ સ્પષ્ટ અને સત્ય છે. પંચો્યાસી વર્ષની વયના સુશીલકુમાર શિંદે કે જેમણે કેન્દ્રીય ગૃહમંત્રી તરીકે પણ સેવા આપી છે, તેમના આ નિવેદને રાજ્ય અને રાષ્ટ્રીય રાજકારણમાં ભારે ચર્ચા જગાવી છે.
