સુરતની નવી સિવિલ હોસ્પિટલમાં અચાનક આગ લાગવાની ગંભીર ઘટના સામે આવતાં સમગ્ર હોસ્પિટલ તંત્ર અને સારવાર લઈ રહેલા દર્દીઓમાં ભારે દોડધામ તથા અફરાતફરીનો માહોલ સર્જાયો હતો. હોસ્પિટલના ફિઝિયોથેરાપી ઓપીડી ઉપર આવેલા જૂના માઈક્રોબાયોલોજી વિભાગના ખાલી હોલમાં અચાનક આગ ભભૂકી ઊઠી હતી. પ્રારંભિક તપાસમાં આ આગ શોર્ટ સર્કિટ અથવા ઈલેક્ટ્રિક સ્પાર્કના કારણે લાગી હોવાનું બહાર આવ્યું છે. જોકે, સદનસીબે આ હોલમાં કોઈ દર્દી હાજર ન હોવાથી અને પ્રશાસનની સમયસૂચકતાના કારણે એક મોટી દુર્ઘટના ટળી ગઈ હતી.
બનાવની જાણ થતાં જ સુરત મ્યુનિસિપલ કોર્પોરેશનનો ફાયર વિભાગ તુરંત એક્શન મોડમાં આવી ગયો હતો. શહેરના જુદા જુદા છ ફાયર સ્ટેશનોમાંથી આશરે નવ જેટલી ફાયર ટેન્ડરની ગાડીઓ અને ફાયર ફાઈટરોનો કાફલો ઘટનાસ્થળે તાત્કાલિક દોડી આવ્યો હતો. ફાયર બ્રિગેડના જવાનોએ વ્યાવસાયિક ઝડપ દાખવીને ગણતરીની મિનિટોમાં જ પાણીનો મારો ચલાવીને આગ પર સંપૂર્ણ કાબૂ મેળવી લીધો હતો. ફાયર ટીમના ઝડપી પ્રતિસાદના કારણે આગ હોસ્પિટલના અન્ય કોઈ સક્રિય વાર્ડ કે દર્દીઓવાળા વિભાગ સુધી પ્રસરી શકી ન હતી, જેના કારણે મોટી રાહત અનુભવાઈ હતી.
ઘટનાની વિગતો આપતા હોસ્પિટલના જવાબદાર અધિકારીઓએ જણાવ્યું હતું કે જે ભાગમાં આગ લાગી ત્યાં ઇલેક્ટ્રિકલ સમારકામની કામગીરી ચાલી રહી હતી. કામગીરી દરમિયાન ડક્ટ પર અચાનક શોર્ટ સર્કિટ થવાથી તણખા ઝર્યા હતા અને ત્યાં રહેલી જ્વલનશીલ સામગ્રીને કારણે આગે રૌદ્ર સ્વરૂપ ધારણ કર્યું હતું. ઘટના સમયે હોલમાં કોઈ દર્દી ન હોવાથી અને માત્ર ચારથી પાંચ કારીગરો જ કામ કરી રહ્યા હતા, જેઓ સમયસર સુરક્ષિત બહાર નીકળી જતા કોઈ જાનહાનિ થઈ નથી. તંત્ર દ્વારા હાલ સમગ્ર સ્થિતિ પર સંપૂર્ણ કાબૂ મેળવી લેવામાં આવ્યો છે અને રાહતનો શ્વાસ લીધો છે.
