નવી દિલ્હી ખાતે આયોજિત ભારત આંતરરાષ્ટ્રીય ચોખા પરિષદના બીજા સંસ્કરણને સંબોધિત કરતા ખાદ્ય પ્રક્રિયા ઉદ્યોગ મંત્રી ચિરાગ પાસવાને જણાવ્યું હતું કે દેશે હવે ચોખાના ઉત્પાદનમાં જથ્થાત્મક અભિગમ છોડીને મૂલ્યવર્ધન તરફ આગળ વધવાની જરૂર છે. આઝાદી પછીના દાયકાઓમાં દેશની પ્રાથમિકતા ખાદ્ય સુરક્ષા અને ઉત્પાદન વધારવાની રહી હતી, જેના કારણે હરિયાળી ક્રાંતિ દ્વારા દેશ અન્ન બાબતે આત્મનિર્ભર બન્યો. પરંતુ વર્તમાન સમયની માંગણી અનુસાર હવે ગુણવત્તા, બ્રાન્ડિંગ, ટ્રેસબિલિટી, ટકાઉપણું અને પ્રોસેસ્ડ ઉત્પાદનો પર વિશેષ ધ્યાન આપવું અનિવાર્ય બની ગયું છે જેથી વૈશ્વિક સ્તરે સ્પર્ધાત્મક બની શકાય.
મંત્રીએ ભારપૂર્વક જણાવ્યું હતું કે દેશમાં ચોખાની મૂલ્ય શૃંખલાને વધુ મજબૂત કરવાની અપાર સંભાવનાઓ રહેલી છે. ડાંગરની ખેતીથી લઈને થાળી સુધીની આ પ્રક્રિયામાં ગુણવત્તા પ્રમાણપત્ર, સંશોધન અને નવીન તકનીકોનો સમાવેશ કરવો સમયની માંગ છે. વડાપ્રધાનના વર્ષ બે હજાર સડતાલીસ સુધીમાં વિકસિત ભારતના સ્વપ્નને સાકાર કરવામાં ખાદ્ય પ્રક્રિયા ક્ષેત્ર નિર્ણાયક ભૂમિકા ભજવશે. ભારત વૈશ્વિક ચોખાના વેપારમાં લગભગ ચાલીસ ટકા હિસ્સો ધરાવે છે, જે આપણા માટે મોટી જવાબદારી અને તક બંને છે. સરકારી યોજનાઓ દ્વારા પ્રોસેસિંગ ઈન્ફ્રાસ્ટ્રક્ચરને વેગ આપીને મૂલ્યવર્ધિત નિકાસમાં વધારો કરવાના પ્રયાસો સતત ચાલુ છે.
ગ્રામીણ સમૃદ્ધિ અને ખેડૂતોની આવક બમણી કરવાના ઉદ્દેશ્ય સાથે કૃષિ ક્ષેત્રને ઉદ્યોગ સાથે જોડવું અત્યંત આવશ્યક છે. સરકારે વ્યાપાર સુગમતા અને વૈશ્વિક જોડાણને મજબૂત કરવા માટે અનેક મોટા સુધારાઓ હાથ ધર્યા છે જેમાં મુક્ત વેપાર કરારોનો પણ સમાવેશ થાય છે. આંતરરાષ્ટ્રીય પ્રતિનિધિઓને આશ્વાસન આપતા મંત્રીએ જણાવ્યું કે સરકાર એક પારદર્શક અને વ્યાપાર-અનુકૂળ વાતાવરણ પૂરું પાડવા માટે કટિબદ્ધ છે. જ્યારે ઉદ્યોગ આગળ વધશે ત્યારે જ સમગ્ર રાષ્ટ્રની પ્રગતિ સુનિશ્ચિત થશે અને ભારત વિશ્વ માટે એક અગ્રેસર ખાદ્ય ભંડાર તરીકે ઉભરી આવશે.
