રાજ્યના ગાંધીધામ શહેરમાં વેપારી સાથે થયેલા નાણાકીય વ્યવહારના વિવાદમાં અદાલતે એક મહત્વપૂર્ણ અને દાખલારૂપ ચુકાદો આપ્યો છે. ભચાઉ તાલુકાના ચોપડવા ગામની હદમાં આવેલી ખાનગી કંપનીમાં ભાગીદારીના વિવાદને લઈને વેપારીને આપવામાં આવેલા રૂપિયા બે કરોડ અગિયાર લાખનો ચેક બેંકમાંથી અપૂરતા ભંડોળના કારણે પરત ફર્યો હતો. આ ગંભીર બાબતને ધ્યાને લઈને પીડિત વેપારી દ્વારા અદાલતમાં કાયદેસરની ફોજદારી કાર્યવાહી શરૂ કરવામાં આવી હતી, જે લાંબી કાનૂની લડાઈ બાદ હવે નિર્ણાયક તબક્કે પહોંચી છે.
પ્રાપ્ત વિગતો અનુસાર, વેપારી ભવનેશ ઉર્ફે પંડ્યા તથા અન્ય ભાગીદારો વચ્ચે વેપાર બાબતે આંતરિક મતભેદો ઊભા થતા ભાગીદારી છૂટી કરવાનો નિર્ણય લેવામાં આવ્યો હતો. નક્કી થયા મુજબ વેપારમાં ભાગીદારી પેટે રૂ બે કરોડ અગિયાર લાખનો ચેક ફરિયાદી વેપારીને આપવામાં આવ્યો હતો. જોકે, બેંકમાં રજૂ કરતા આ ચેક બાઉન્સ થતા સમગ્ર માબલો અદાલતમાં પહોંચ્યો હતો. નેગોશિયેબલ ઇન્સ્ટ્રુમેન્ટ એક્ટ હેઠળ ચલાવવામાં આવેલા આ કેસમાં પુરાવાઓ અને દલીલોને આધારે ગાંધીધામ અદાલતે બંને આરોપીઓને દોષિત જાહેર કર્યા છે.
અદાલતે કાયદાકીય પ્રક્રિયા પૂર્ણ કર્યા બાદ બંને દોષિતોને એક-એક વર્ષની સાદી કેદની સજા ફટકારી છે અને સાથેસાથે રૂપિયા ચાર કરોડ બાવીસ લાખનો સંયુક્ત દંડ ચૂકવવાનો હુકમ કર્યો છે. આ દંડની પૂરેપૂરી રકમ ફરિયાદી વેપારીને વળતર સ્વરૂપે આપવાની રહેશે. જો દોષિતો દ્વારા દંડની આ રકમ સમયસર ભરવામાં નહીં આવે, તો તેમણે વધુ છ મહિનાની વધારાની સાદી કેદની સજા ભોગવવી પડશે. અદાલતના આ કડક નિર્ણયથી વાણિજ્યિક અને વેપારી જગતમાં નાણાકીય લેવડદેવડમાં ગેરરીતિ આચરનારા તત્વોમાં મોટો ફફડાટ ફેલાઈ ગયો છે.
