અમેરિકાના વિદેશમંત્રી માર્કો રુબિયો આજે એક દિવસીય વિશેષ મુલાકાતે જામનગર આવી પહોંચ્યા હતા. જામનગર એરપોર્ટ પર તેમનું ભવ્ય સ્વાગત કરવામાં આવ્યું હતું. તેમના આગમનને લઈને સ્થાનિક તંત્ર અને સુરક્ષા એજન્સીઓ દ્વારા ચુસ્ત બંદોબસ્ત ગોઠવવામાં આવ્યો હતો. એરપોર્ટ પર ઉતરાણ કર્યા બાદ એક વિશાળ અને સુરક્ષિત વાહનકાફલા સાથે તેઓ જામનગર નજીક આવેલા મોટીખાવડી વિસ્તાર તરફ રવાના થયા હતા. વિદેશમંત્રીના આગમનથી સમગ્ર પંથકમાં ઉત્સાહ અને સુરક્ષાને લઈને વિશેષ ચર્ચાઓ જાગી હતી.
મોટીખાવડી ખાતે આવેલા રિલાયન્સ ઇન્ડસ્ટ્રીઝના વનતારા સંકુલની તેમણે મુલાકાત લીધી હતી. આ કેન્દ્ર વન્યજીવોના બચાવ, અત્યાધુનિક સારવાર, પુનર્વસન અને તેમની સંભાળ માટે વિશ્વભરમાં નામના ધરાવે છે. અહીં પ્રાણીઓની સંભાળ માટે ઉપલબ્ધ આધુનિક સુવિધાઓ અને વૈજ્ઞાનિક અભિગમને અમેરિકાના વિદેશમંત્રીએ નજીકથી નિહાળ્યો હતો. આંતરરાષ્ટ્રીય સ્તરે વન્યજીવ સંરક્ષણ ક્ષેત્રે થઈ રહેલા ઉત્કૃષ્ટ કાર્યોથી તેઓ પ્રભાવિત થયા હતા અને આ સંકેુલની કામગીરીની પ્રશંસા કરી હતી.
આ ઉચ્ચ કક્ષાના આંતરરાષ્ટ્રીય મહાનુભાવની મુલાકાતને પગલે જામનગર ફરી એકવાર વૈશ્વિક નકશા પર કેન્દ્રસ્થાને આવ્યું છે. એરપોર્ટથી લઈને વનતારા સુધીના સમગ્ર માર્ગ પર સુરક્ષા વ્યવસ્થા એટલી કડક રાખવામાં આવી હતી કે સામાન્ય વાહનવ્યવહાર પર પણ વિશેષ નજર રાખવામાં આવી હતી. આ મુલાકાત માત્ર રાજદ્વારી દ્રષ્ટિએ જ નહીં પરંતુ વન્યજીવ સંરક્ષણ અને પર્યાવરણના ક્ષેત્રે પણ જામનગરની વૈશ્વિક ઓળખને વધુ મજબૂત કરનારી સાબિત થઈ છે.
