ગોંડલ બસ સ્ટેન્ડ વિસ્તારમાં સાયબર ઠગાઈનો એક અત્યંત ચોંકાવનારો કિસ્સો પ્રકાશમાં આવ્યો છે, જ્યાં સરકારી કર્મચારીના મોબાઈલમાંથી કોઈપણ પ્રકારની લિંક ઓપન કર્યા વિના જ ઓટીપી અને યુપીઆઈ લિંક્સ આપોઆપ અજાણ્યા નંબરો પર શેર થઈ ગઈ હતી અને સાયબર ઠગોએ બેંક ખાતું ખાલી કરી નાખ્યું હતું. મૂળ બોટાદના વતની અને હાલ ગોંડલની પોસ્ટ ઓફિસમાં ક્લાર્ક તરીકે ફરજ બજાવતા અસુરેશભાઈ હરજીભાઈ વાઘેલા સાથે આ ગંભીર ઘટના બની છે. તેઓ અમદાવાદથી બસ દ્વારા ગોંડલ પરત ફરી રહ્યા હતા તે દરમિયાન તેમના ફોન પર સતત ઓટીપી આવવા લાગ્યા હતા.
પ્રાપ્ત વિગતો અનુસાર, ફરિયાદીએ પોતાના મોબાઈલમાંથી ન તો કોઈ શંકાસ્પદ લિંક પર ક્લિક કર્યું હતું અને ન તો કોઈને ફોન પર પોતાનો ગુપ્ત કોડ કે ઓટીપી જણાવ્યું હતું. તેમ છતાં, અજાણ્યા હેકર્સો દ્વારા કોઈ ટેકનિકલ યુક્તિ વાપરીને મોબીક્વીક અને ફોન પે સંબંધિત માહિતી તથા ઓટીપી આપોઆપ અન્ય મોબાઈલ નંબરો પર ટ્રાન્સફર કરી દેવામાં આવ્યા હતા. શરૂઆતમાં થોડો સમય બધું સામાન્ય લાગ્યું પરંતુ થોડા દિવસો બાદ જ્યારે તેઓ ગોંડલ બસ સ્ટેન્ડ પર હાજર હતા ત્યારે તેમની કેનેરા બેંક શાખાના ખાતામાંથી મોટા પ્રમાણમાં નાણાં ઉપડી ગયા હોવાનો સંદેશો મળ્યો હતો.
ઠગોએ પહેલા એક સાથે લાખો રૂપિયા અને ત્યારબાદ દસ-દસ હજારના ત્રણ અલગ વ્યવહારો કરીને કુલ રૂપિયા ત્રણ લાખ અઠ્યાસી હજારથી વધુની માતબર રકમ તફડાવી લીધી હતી. અચાનક ખાતું ખાલી થઈ જતા ઘાબરાયેલા કર્મચારીએ તાત્કાલિક સાયબર હેલ્પલાઇન નંબર પર સંપર્ક કરીને પોતાની પ્રાથમિક ફરિયાદ નોંધાવી હતી. આ મામલાની ગંભીરતાને ધ્યાનમાં રાખીને સ્થાનિક પોલીસ દ્વારા સંબંધિત બેંક ખાતાઓ અને દસથી વધુ શંકાસ્પદ મોબાઈલ ધારકો વિરુદ્ધ ગુનો નોંધીને સઘન તપાસનો ધમધમાટ શરૂ કરવામાં આવ્યો છે. આ ઘટનાએ ડિજિટલ યુગમાં નાગરિકોની સુરક્ષા સામે મોટા સવાલો ખડા કર્યા છે.
