દેશના ભાવિ પેઢીમાં નાનપણથી જ વ્યવસાયિક સૂઝબૂઝ અને ઉદ્યોગસાહસિકતાના ગુણો કેળવાય તે હેતુથી શિક્ષણ ક્ષેત્રે એક ક્રાંતિકારી પહેલ કરવામાં આવી છે. રાષ્ટ્રીય શૈક્ષણિક સંશોધન અને તાલીમ પરિષદ એટલે કે એનસીઈઆરટી દ્વારા ધોરણ ૯ ના સામાજિક વિજ્ઞાનના નવા પાઠ્યપુસ્તકમાં સ્ટાર્ટઅપ અને ઉદ્યોગસાહસિકતાના વિષયનો સમાવેશ કરવામાં આવ્યો છે. આ નવા બદલાવને કારણે વિદ્યાર્થીઓ હવે શાળા કક્ષાએથી જ નવો વ્યવસાય શરૂ કરવાના મૂળભૂત સિદ્ધાંતો, બજારની વાસ્તવિકતાઓ અને આર્થિક વ્યવસ્થાપન વિશે ગહન સમજ મેળવી શકશે.
આ વિશેષ પ્રકરણ અંતર્ગત વિદ્યાર્થીઓને મુખ્યત્વે ત્રણ મહત્વના પાસાઓ પર શિક્ષણ આપવામાં આવશે. જેમાં ઉદ્યોગસાહસિકતાની સમાજ અને અર્થવ્યવસ્થા પર પડતી સકારાત્મક અસરો, કોઈપણ વ્યાપારના મુખ્ય કાર્યાત્મક ક્ષેત્રો અને એક સફળ તથા વ્યવહારુ બિઝનેસ પ્લાન કઈ રીતે તૈયાર કરવો તેની વિગતવાર માહિતી અપાશે. ભારતમાં સ્ટાર્ટઅપ ક્ષેત્રની પ્રારંભિક સફરથી લઈને દેશના આર્થિક વિકાસમાં તેના યોગદાન વિશે પણ વિદ્યાર્થીઓને માહિતગાર કરાશે. સરકારનું મુખ્ય લક્ષ્ય સંશોધન, ઉદ્યોગ, સ્ટાર્ટઅપ અને ઉદ્યમિતાના ચાર સ્તંભોને એક મંચ પર લાવી યુવાધનને નોકરી શોધનારના બદલે નોકરી આપનાર બનાવવાનું છે.
નવા પાઠ્યપુસ્તકમાં નાના ઉદાહરણો દ્વારા મોટા વ્યાપારિક આયોજનોની રૂપરેખા સરળ ભાષામાં સમજાવવામાં આવી છે. બજારની વધઘટ અને ગતિવિધિઓને સમજવી, ઉપલબ્ધ નવી તકોની સમયસર ઓળખ કરવી, કાર્યક્ષમતાનું યોગ્ય આકલન કરવું અને ચોક્કસ યોજના ઘડવી એ કોઈપણ ઉદ્યોગની સફળતાની ચાવી છે. આજના આધુનિક યુગમાં કૃત્રિમ બુદ્ધિમત્તા એટલે કે એઆઈ જેવી અદ્યતન તકનીકો બજાર વિશ્લેષણ અને વ્યાવસાયિક નિર્ણયો લેવામાં કઈ રીતે મદદરૂપ સાબિત થાય છે, તેનો રોચક પરિચય પણ વિદ્યાર્થીઓને કરાવવામાં આવ્યો છે.
વિદ્યાર્થીઓને વાસ્તવિક જીવનમાંથી પ્રેરણા મળે તે માટે પુસ્તકમાં દેશની જાણીતી સફળ ગાથાઓનો સમાવેશ કરાયો છે. જેમાં દેશના અગ્રણી હોટેલ વ્યવસાયી મોહનસિંહ ઓબેરોયનો સંઘર્ષ, તેમના સપના અને સફળતાની સફર રજૂ કરવામાં આવી છે. આ ઉપરાંત સામાન્ય આર્થિક સ્થિતિ ધરાવતી માત્ર સાત મહિલાઓ દ્વારા ઘરેલુ સ્તરે શરૂ કરાયેલા અને આજે વૈશ્વિક સ્તરે વિખ્યાત બનેલા લિજ્જત પાપડની અદભુત પ્રેરણાદાયી સફળતા પણ દર્શાવવામાં આવી છે. આ નવતર અભ્યાસક્રમ દેશના યુવાનોને આત્મનિર્ભર બનવા તરફ મહત્વનું પ્રોત્સાહન પૂરું પાડશે.
