સાબરકાંઠા જિલ્લાના ઈડર પોલીસ સ્ટેશનમાંથી અત્યંત ચોંકાવનારી અને ગંભીર ઘટના સામે આવી છે, જ્યાં પોલીસ કસ્ટડીમાં રાખવામાં આવેલા ૩૯ વર્ષીય એક શખ્સે લોકઅપના સળિયા સાથે ગળેફાંસો ખાઈને જીવનલીલા સંકેલી લીધી છે. મૃતકની ઓળખ મૂળ મહેસાણાના ખેરાલુ તાલુકાના મિયાસણા ગામના વતની અને હાલ સાસરી પક્ષના ઈડર તાલુકાના લક્ષ્મણગઢ ગામે રહેતા અનિલ ગોવિંદભાઈ વાઘેલા તરીકે થઈ છે. કસ્ટડીમાં જ આરોપીએ પોતાના નાઈટ ડ્રેસની દોરી વડે સળિયા સાથે ફાંસો લગાવી લેતાં સમગ્ર પોલીસ તંત્રમાં ભારે દોડધામ અને ચકચાર મચી ગઈ છે.
પ્રાપ્ત વિગતો અનુસાર, ગત મોડી રાત્રે અનિલ વાઘેલાના પરિવારમાં તીવ્ર ગૃહકંકાસ સર્જાયો હતો. પારિવારિક વિવાદ ચરમસીમાએ પહોંચતાં ત્રસ્ત પત્નીએ તાત્કાલિક મદદ માટે આપાતકાલીન નંબર ૧૧૨ પર ફોન કર્યો હતો. પોલીસ કંટ્રોલ રૂમના સંદેશાના આધારે ઈડર પોલીસની ટીમ તુરંત લક્ષ્મણગઢ ગામે પહોંચી હતી અને અનિલની અટકાયત કરીને તેને પોલીસ મથકે લઈ આવી હતી. જોકે, લોકઅપમાં બંધ અનિલે વહેલી સવારે અગમ્ય કારણોસર કે હતાશામાં આવી જઈ આ આત્યંતિક પગલું ભરી લીધું હતું.
પોલીસ સ્ટેશનની અંદર જ બનેલા આ ચકચારી બનાવના પગલે ઉચ્ચ પોલીસ અધિકારીઓ તાત્કાલિક ઈડર પોલીસ મથકે અને ત્યારબાદ સિવિલ હોસ્પિટલ ખાતે દોડી આવ્યા હતા. કસ્ટોડિયલ ડેથ જેવી સંવેદનશીલ ઘટના હોવાથી ઈડર પ્રાંત અધિકારીની પ્રત્યક્ષ ઉપસ્થિતિમાં પંચનામું અને કાયદેસરની મેજિસ્ટ્રિયલ કાર્યવાહી હાથ ધરવામાં આવી છે. સામાન્ય પારિવારિક તકરાર બાદ પોલીસ અટકાયતમાં યુવકે આત્મહત્યા કરી લેતાં સમગ્ર પંથકમાં ભારે અરેરાટી વ્યાપી ગઈ છે અને પરિવારજનોમાં આક્રંદ છવાઈ ગયું છે.
![[ફ્રાન્સમાં જીવન જરૂરિયાતની ચીજવસ્તુઓના વધતા ભાવ સામે ઉગ્ર વિરોધ પ્રદર્શન, એક હજારથી વધુ લોકોની ધરપકડ]](/media/news_images/main_img_20261025_050516_7d6c00.jpg)
