અમદાવાદ શહેરના રામોલ વિસ્તારમાં પારિવારિક તકરારે અત્યંત ભયાનક અને હૃદયદ્રાવક વળાંક લીધો છે. લવકુશ એપાર્ટમેન્ટ ખાતે મોડી રાત્રે ક્ષુલ્લક બાબતે શરૂ થયેલો વિવાદ જોતજોતામાં લોહિયાળ સંગ્રામમાં ફેરવાઈ ગયો હતો. સગા મામા અને સગીર વયના ભાણેજ વચ્ચે થયેલા આ ખૂની સંઘર્ષમાં વળતા પ્રહાર દરમિયાન ભાણેજનું કરુણ મોત નીપજ્યું છે, જ્યારે મામા અને મામી ગંભીર રીતે ઘાયલ થતાં તેમને અત્યંત નાજુક હાલતમાં સારવાર અર્થે હોસ્પિટલમાં ખસેડવામાં આવ્યા છે. અડધી રાત્રે એક જ પરિવારમાં વહેતાં થયેલાં લોહીના કારણે સમગ્ર વિસ્તારમાં ભારે અરેરાટી અને સનસનાટી વ્યાપી ગઈ છે.
પ્રાપ્ત વિગતો અનુસાર, રાત્રિના સુમારે પરિવારજનો વચ્ચે કોઈ કારણોસર બોલાચાલી થઈ રહી હતી, તે દરમિયાન આવેશમાં આવીને સગીર ભાણેજે અપશબ્દો બોલવાનું શરૂ કર્યું હતું. આ અશોભનીય વર્તન જોઈને મામાએ તેને મર્યાદા જાળવવા અને ગાળો ન બોલવા બાબતે કડક ટકોર કરી હતી. વડીલની આ શિખામણથી ઉશ્કેરાયેલા ભાણેજે આપો ગુમાવી પોતાની પાસે રહેલી છરી વડે સીધો જ મામા અને મામી પર જીવલેણ હુમલો કરી દીધો હતો. આ અણધાર્યા આક્રમણમાં દંપતી લોહીલુહાણ થઈ ગયું હતું. જીવ પર આવી બનતાં, સ્વબચાવમાં મામાએ પણ વળતો પ્રહાર કર્યો હતો. બંને પક્ષે થયેલી ઉગ્ર ઝપાઝપી અને વળતા હુમલામાં સગીર ભાણેજને ગંભીર ઈજાઓ પહોંચતાં તેનું પ્રાણપંખેરું ઊડી ગયું હતું.
બનાવની જાણ થતાં જ આસપાસના રહીશો એકઠા થઈ ગયા હતા અને તુરંત પોલીસને જાણ કરવામાં આવી હતી. ઘટનાની ગંભીરતાને ધ્યાને રાખી રામોલ પોલીસનો કાફલો સ્થળ પર તેમજ હોસ્પિટલ પહોંચી ગયો હતો. હાલ ગંભીર ઇજાગ્રસ્ત મામા-મામી જીવન-મરણ વચ્ચે ઝોલાં ખાઈ રહ્યા છે. પોલીસે આ મામલે મૃતક સગીર સામે હત્યાના પ્રયાસનો, જ્યારે ઇજાગ્રસ્ત મામા વિરુદ્ધ હત્યાનો ગુનો નોંધીને કાયદેસરની કડક કાર્યવાહી હાથ ધરી છે. ક્ષણિક ક્રોધ અને અસંયમે કેવી રીતે હસતા-રમતા પરિવારનો માળો વિખેરી નાખ્યો, તે બાબત હાલ ટોક ઓફ ધ ટાઉન બની છે.
![[ફ્રાન્સમાં જીવન જરૂરિયાતની ચીજવસ્તુઓના વધતા ભાવ સામે ઉગ્ર વિરોધ પ્રદર્શન, એક હજારથી વધુ લોકોની ધરપકડ]](/media/news_images/main_img_20261025_050516_7d6c00.jpg)
