સંસ્કારી નગરી વડોદરામાં આદ્યશક્તિની આરાધનાના મહાપર્વ નવરાત્રિના પ્રારંભે જ ગરબા રસિકો માટે માઠા સમાચાર સામે આવ્યા છે. શહેરના પ્રખ્યાત અને સુરક્ષિત ગણાતા મોટા ગરબા મહોત્સવોમાં તસ્કરોએ સપાટો બોલાવ્યો છે. ગરબે ઘૂમવામાં મશગૂલ ખેલૈયાઓની ભારે ભીડનો ગેરલાભ ઉઠાવીને અંદર ઘૂસી ગયેલી રીઢા ચોરોની ટોળકીએ અસંખ્ય કિંમતી સ્માર્ટફોન તફડાવી લીધા હતા. આ ઘટનાને પગલે પોતાના મોંઘા મોબાઈલ ફોન ગુમાવી ચૂકેલા ખેલૈયાઓમાં આયોજકો અને સુરક્ષા તંત્ર સામે ભારે નારાજગી અને આક્રોશ ફાટી નીકળ્યો છે.
પ્રાપ્ત વિગતો અનુસાર, શહેરના અતિ પ્રતિષ્ઠિત યુનાઈટેડ વે ગરબા ગ્રાઉન્ડ ખાતે પ્રથમ નોરતે ઉત્સાહપૂર્વક રાસ રમી રહેલા ખેલૈયાઓને નિશાન બનાવી તસ્કરોએ એકસાથે વીસથી વધુ કિંમતી મોબાઈલ ચોરી લીધા હતા. આ ઉપરાંત વીએનએફ ગરબા મહોત્સવમાં પણ પહેલા જ દિવસે અનેક ખેલૈયાઓના ફોન ચોરાયા હોવાની વિગતો બહાર આવી છે. ગરબાના તાલ વચ્ચે ભીડનો લાભ લઈને તસ્કરોએ અત્યંત બેખૌફ બનીને હાથફેરો કર્યો હતો, જેના કારણે ખેલૈયાઓના ઉત્સાહ અને રંગમાં ભંગ પડ્યો હતો.
પોતાના કિંમતી મોબાઈલ ગુમાવ્યા બાદ આક્રોશે ભરાયેલા યુવાનો સીધા રાવપુરા પોલીસ સ્ટેશને પહોંચ્યા હતા, જ્યાં અરજી અને ફરિયાદ નોંધાવવા માટે ભોગ બનનારાઓની લાંબી કતારો જોવા મળી હતી. ઉલ્લેખનીય છે કે, નવરાત્રિ પર્વને લઈને પોલીસ તંત્ર દ્વારા ડ્રોન કેમેરાથી સર્વેલન્સ, શી ટીમની વિશેષ તૈનાતી, સીસીટીવી કેમેરા અને જડબેસલાક બંદોબસ્તના મોટા દાવા કરવામાં આવ્યા હતા. તેમ છતાં ખાનગી સુરક્ષા અને પોલીસની હાજરી વચ્ચે તસ્કરો બિન્ધાસ્ત ચોરી કરીને ફરાર થઈ જતાં આયોજકોની સુરક્ષા વ્યવસ્થાની પોલ ખુલી ગઈ છે અને પોલીસની તકેદારી સામે પણ ગંભીર સવાલો ખડા થયા છે.
