સુરત શહેરમાંથી કૃત્રિમ બુદ્ધિમત્તા એટલે કે આધુનિક એઆઈ ટેકનોલોજીના ગેરકાયદે દુરુપયોગનો અત્યંત ચોંકાવનારો કિસ્સો પ્રકાશમાં આવ્યો છે. પોતાના પૂર્વ પ્રેમીનું સગપણ અન્ય યુવતી સાથે નક્કી થઈ જતાં ઈર્ષ્યા અને બદલાની ભાવનામાં અંધ બનેલી એક મહિલાએ યુવતી તેમજ તેની માતાના નકલી અને અશ્લીલ ફોટો-વીડિયો બનાવી સોશિયલ મીડિયા પર વાયરલ કરી દીધા હતા. આ ગંભીર સાયબર ગુના સંદર્ભે ભોગ બનનાર પરિવારે ફરિયાદ નોંધાવતાં ડિંડોલી પોલીસે ત્વરિત કાર્યવાહી હાથ ધરીને આરોપી મહિલાની ધરપકડ કરી લીધી છે.
સમગ્ર મામલાની વિગતો અનુસાર, ડિંડોલી પોલીસ મથકમાં એક યુવતીએ ફરિયાદ નોંધાવી હતી કે ઇન્સ્ટાગ્રામ પર અજાણ્યા બોગસ આઈડી બનાવીને તેના તેમજ તેની માતાના ન્યૂડ અને આપત્તિજનક ફોટો પોસ્ટ કરવામાં આવી રહ્યા છે. આધુનિક સોફ્ટવેરની મદદથી તૈયાર કરાયેલી આ બિભત્સ સામગ્રીને કારણે પરિવારની સામાજિક પ્રતિષ્ઠા જોખમાઈ હતી. પોલીસે ટેકનિકલ સર્વેલન્સ અને ડિજિટલ પુરાવાઓના આધારે તપાસ તેજ કરી હતી, જેના અંતે આ હીન કૃત્ય આચરનાર ભૂમિકા ધર્મેશભાઈ ધુલિયા નામની મહિલાને ઝડપી પાડવામાં સફળતા મળી હતી.
પોલીસની પ્રાથમિક પૂછપરછમાં બહાર આવ્યું છે કે, ઝડપાયેલી આરોપી ભૂમિકા અગાઉ ફરિયાદી યુવતીના મંગેતર સાથે પ્રેમસંબંધ ધરાવતી હતી. જોકે, પ્રેમી સાથે સંબંધ તૂટ્યા બાદ તેના સંબંધો ફરિયાદી યુવતી સાથે નક્કી થયા હતા. આ બાબત સહન ન થતાં આરોપી મહિલાએ મનમાં ભારે અદાવત રાખી હતી અને સગાઈ તોડાવવા તથા યુવતીને બદનામ કરવાના બદઈરાદાથી આ કાવતરું ઘડ્યું હતું. હાલમાં પોલીસે આરોપી પાસેથી વપરાયેલા મોબાઈલ સહિતના ડિજિટલ ઉપકરણો જપ્ત કરી આ મામલે કાયદેસરની કડક કાર્યવાહી હાથ ધરી છે.
