સુરેન્દ્રનગર શહેરમાં જાણીતી બ્રાન્ડના નામે ડુપ્લિકેટ ધૂમ્રપાન સામગ્રી અને તમાકુ ઉત્પાદનોનું ગેરકાયદે વેચાણ કરતા એક શખ્સને પોલીસે ઝડપી પાડ્યો છે. શહેરના ઉપાસના સર્કલ પાસેથી સ્પેશિયલ ઓપરેશન ગ્રૂપની ટીમે પેટ્રોલિંગ દરમિયાન મળેલી બાતમીના આધારે રતનપર વિસ્તારના એક ચોવીસ વર્ષીય યુવાનને નકલી સિગારેટ, બીડી અને તમાકુના જથ્થા સાથે રંગેહાથ ઝડપી લીધો હતો. આ કાર્યવાહી દરમિયાન પોલીસે આરોપી પાસેથી ચોક્કસ બ્રાન્ડની નકલી ચીજવસ્તુઓ ઉપરાંત વાહન અને મોબાઈલ ફોન સહિત લાખો રૂપિયાનો મુદ્દામાલ જપ્ત કરીને કાયદેસરની કાર્યવાહી હાથ ધરી છે.
પ્રાપ્ત વિગતો અનુસાર, સુરેન્દ્રનગર જિલ્લા સ્પેશિયલ ઓપરેશન ગ્રૂપના પોલીસ ઇન્સ્પેક્ટર બી. એચ. શીંગરખીયાના માર્ગદર્શન હેઠળ પોલીસ સ્ટાફના કાનાભાઈ, હરદેવસિંહ તથા વિશાલભાઈ સહિતની ટીમ પેટ્રોલિંગમાં હતી. તે દરમિયાન શહેરના ઉપાસના સર્કલ પાસેથી શંકાસ્પદ હાલતમાં પસાર થઈ રહેલા રતનપરના ગુરુ દત્તાત્રેય મંદિર સામે રહેતા જયપાલ મનહરભાઈ કણઝરીયા નામના યુવકને અટકાવીને તેની કારની તલાશી લેવામાં આવી હતી. તપાસ દરમિયાન કારમાંથી વિવિધ નામાંકિત કંપનીઓના માર્કાવાળી સિગારેટ, તમાકુ અને બીડીનો મોટો જથ્થો મળી આવ્યો હતો. પોલીસે કાર અને મોબાઈલ સહિત કુલ રૂપિયા ૪,૪૧,૪૧૦નો મુદ્દામાલ કબ્જે કરીને યુવકની અટકાયત કરી તેને બી ડિવિઝન પોલીસ મથકે સોંપ્યો હતો.
પોલીસ કબ્જે કરેલો માલસામાન શંકાસ્પદ જણાતાં સંબંધિત કોપીરાઈટ ધરાવતી વિવિધ મૂળ કંપનીઓના પ્રતિનિધિઓ હિરેન પટેલ, રફીક લાખાણી અને શનિ જૈનને સ્થળ પર બોલાવીને ખરાઈ કરાવવામાં આવી હતી. કંપનીના અધિકારીઓએ તપાસ કરતાં આ તમામ જથ્થો બોગસ અને ગુણવત્તા વગરનો ડુપ્લિકેટ હોવાનું સ્પષ્ટ થયું હતું. આથી મૂળ બ્રાન્ડનો દુરુપયોગ કરી કોપીરાઈટ ધારાનો ભંગ કરવા બદલ જયપાલ કણઝરીયા સામે ગુનો દાખલ કરવામાં આવ્યો છે. આ નકલી જથ્થો ક્યાંથી લાવવામાં આવ્યો હતો અને સ્થાનિક બજારમાં કોને સપ્લાય કરવાનો હતો તે અંગે પોલીસ સબ ઇન્સ્પેક્ટર એમ. બી. જેબલીયા વધુ તપાસ ચલાવી રહ્યા છે.
