તેલંગાણામાં ભ્રષ્ટાચાર વિરોધી શાખા દ્વારા નાગરિક પુરવઠા વિભાગના એક ઉચ્ચ અધિકારી સામે અપ્રમાણસર સંપત્તિના મામલે મોટી કાર્યવાહી હાથ ધરવામાં આવી છે. મહબૂબાબાદ જિલ્લામાં નાગરિક પુરવઠા વિભાગના જિલ્લા વ્યવસ્થાપક તરીકે ફરજ બજાવતા વી. નરસિમ્હા રાવ સામે આવક કરતાં વધુ સંપત્તિ હોવાની બાતમીના આધારે તપાસ એજન્સીએ સપાટો બોલાવ્યો હતો. અધિકારી, તેના સંબંધીઓ અને નિકટના સાથીદારો સાથે જોડાયેલા કુલ સાત અલગ-અલગ સ્થળો પર હાથ ધરાયેલી તપાસ દરમિયાન આશરે ૯.૪૧ કરોડ રૂપિયાની બેહિસાબી સંપત્તિનો પર્દાફાશ થયો છે. આ અધિકારી અગાઉ ખમ્મમ કલેક્ટર કચેરીમાં ફરજ બજાવતો હતો અને તે સમય દરમિયાન તેણે હોદ્દાનો દુરુપયોગ કરીને મોટાપાયે અપ્રમાણસર મિલકતો ભેગી કરી હોવાની વિગતો સામે આવી છે.
દરોડા દરમિયાન અધિકારી અને તેના પરિવારજનોના નામે મોટાપાયે સ્થાવર મિલકતો હોવાના દસ્તાવેજો મળ્યા છે. ખમ્મમ જિલ્લાના બલ્લેપલ્લી, રઘુનાથપાલેમ અને વેલુગુમટલા ખાતે ૧,૨૩૦ ચોરસ વારથી વધુ ક્ષેત્રફળ ધરાવતા પાંચ ખુલ્લા પ્લોટ મળી આવ્યા છે. આ ઉપરાંત સૂર્યાપેટ જિલ્લાના કમલા ચેરુવુ, સિરીકોંડા અને મોથે વિસ્તારમાં વિશાળ ખેતીની જમીનો મળી આવી છે, જેમાં નવાવરમ ખાતે આશરે ૫.૩૧ એકરના બે મોટા જમીનના ટુકડા સામેલ છે. તપાસ દરમિયાન રહેણાંક અને વ્યાવસાયિક હેતુ માટેની ત્રણ બહુમાળી આલીશાન ઇમારતો પણ મળી આવી છે, જેમાં ખમ્મમ અને એલબી નગર વિસ્તારમાં આવેલી ઇમારતોનો સમાવેશ થાય છે. આ ઇમારતો અધિકારી, તેની પત્ની અને સસરાના નામે નોંધાયેલી છે, જેની સરકારી નોંધણી કિંમત જ દોઢ કરોડથી વધુ દર્શાવવામાં આવી છે.
સ્થાવર મિલકતો ઉપરાંત અધિકારીના રહેઠાણ પરથી ૩૬૦ ગ્રામથી વધુ સોનાના અને ૩૩૧ ગ્રામ ચાંદીના દાગીના પણ જપ્ત કરવામાં આવ્યા છે. વાહનોની તપાસમાં એક મોંઘીદાટ લક્ઝરી ગાડી અને બે દ્વિચક્રી વાહનો મળી આવ્યા છે, જ્યારે ઘરમાંથી આશરે ૩૩.૪૮ લાખ રૂપિયાનો કિંમતી ઘરવખરીનો સામાન પણ મળી આવ્યો હતો. ભ્રષ્ટાચાર નિવારણ અધિનિયમની વિવિધ કલમો હેઠળ અધિકારી વિરુદ્ધ ગુનો દાખલ કરીને આગળની કાયદેસરની તપાસ શરૂ કરવામાં આવી છે. તપાસ એજન્સી દ્વારા બેંક ખાતાઓ અને લૉકરોની પણ ચકાસણી હાથ ધરાઈ રહી છે, જેથી આ ગેરકાયદે સંપત્તિનો આંકડો હજુ પણ વધવાની શક્યતા છે.
