વૈશ્વિક સ્તરે આર્ટિફિશિયલ ઇન્ટેલિજન્સ એટલે કે એઆઈ ઝડપી વિકાસ વચ્ચે હવે વિવિધ દેશોએ પોતાની તકનીકી સુરક્ષા અંગે ગંભીરતાથી વિચારવાનો સમય આવી ગયો છે. જાણીતી ટેકનોલોજી સંસ્થા એડેપ્શન સાથે સંકળાયેલા અગ્રણી સુદીપ રોયે એક મહત્વપૂર્ણ ચર્ચા દરમિયાન પ્રશ્ન ઉઠાવ્યો છે કે શું દેશોએ પોતાની મહત્વની વ્યવસ્થાઓ માટે વિદેશી એઆઈ મોડેલો પર નિર્ભર રહેવું જોઈએ? તેમના મતે અન્ય દેશોની તકનીક પર વધુ પડતી નિર્ભરતા લાંબા ગાળે રાષ્ટ્રીય સુરક્ષા અને ડિજિટલ સાર્વભૌમત્વ માટે મોટો ખતરો સાબિત થઈ શકે છે.
સુદીપ રોયના જણાવ્યા અનુસાર, જ્યારે કોઈ રાષ્ટ્ર સંરક્ષણ, નાણાકીય બાબતો, શાસન અને આરોગ્ય જેવા અત્યંત સંવેદનશીલ ક્ષેત્રોમાં વિદેશી ટેકનોલોજીનો ઉપયોગ કરે છે, ત્યારે દેશના નાગરિકોનો મહત્વપૂર્ણ ડેટા સરહદ પાર જવાનું જોખમ રહે છે. આ ઉપરાંત ભૌગોલિક-રાજકીય તણાવ કે વૈશ્વિક સંકટના સમયે જો વિદેશી સેવાઓ અચાનક બંધ કરી દેવામાં આવે, તો તે દેશનું સમગ્ર વહીવટી માળખું ખોરવાઈ શકે છે. તેથી દરેક દેશે પોતાનો ડેટા સ્થાનિક સ્તરે સંગ્રહિત રહે અને નિર્ણયો પર પોતાની સ્વાયત્તતા જળવાઈ રહે તે બાબતને પ્રાથમિકતા આપવી જોઈએ.
તેમણે સાર્વભૌમ એઆઈ વિકાસ પર ભાર મૂકતા જણાવ્યું કે દેશોએ માત્ર ઉપભોક્તા બનવાને બદલે ઉત્પાદક બનવું પડશે. સ્થાનિક સ્તરે સંશોધન, વિકાસ અને નવીનતાને વેગ આપીને જ સાચી આત્મનિર્ભરતા મેળવી શકાય છે. જો સ્થાનિક ભાષાઓ અને સંસ્કૃતિને અનુરૂપ પોતાની પ્રણાલી તૈયાર કરવામાં નહીં આવે, તો વિદેશી પ્રણાલીઓના પૂર્વગ્રહો સ્થાનિક સમાજ પર પ્રભાવ પાડશે. આથી, વિશ્વસનીય અને સુરક્ષિત ભવિષ્ય માટે અત્યારથી જ પોતાના કમ્પ્યુટિંગ ઈન્ફ્રાસ્ટ્રક્ચરમાં રોકાણ કરવું પ્રત્યેક રાષ્ટ્ર માટે અનિવાર્ય બની ગયું છે.
